本身第一站就係酒店對面嘅 Carlisle 城堡。但佢十點先開門。所以喺個鎮度先個轉先。
我哋遠處見到呢棟嘢，上面用 non-serif 字體寫住 "ofs"，仲諗住係啲咩公司嘅商標嚟。心諗啲古建築都可以攞嚟賣廣告？
行近先發現原來係 "old fire station" 咁解。好似話攞咗嚟做演藝嘅場地。
酒店左近嘅教堂又係幾靚。呢度地方開始偏僻，冇乜人，唔會好似倫敦咁樣同人迫入間教堂度。
但見到啲咁靚嘅建築拍烏蠅都有少少唏噓。
我哋去 Carlisle Castle 嗰陣佢啱啱開門。
喺城門行出嚟嗰個人，係出嚟喺個門牌度掛上「Open」⋯ （我哋望住張牌背面係「Closed」嚇咗半秒）
門口冇人，一睇個格局就知今次係「包場」。 Carlisle Castle 唔算出名，我哋呢度又少少偏僻，冇人都好正常。（是日行程都係包場為主）
由於已經睇過唔少城堡，呢個格局都係差唔多。不過勝在冇人⋯ 啲工作人員見到我哋，好努力咁介紹呢樣嗰樣。
其中一個比較有趣嘅嘢係，佢哋話呢啲石刻係有個守衛定係唔知乜畫嘅。反正我就覺得係有少少詭異。
下一站係 Caerlaverock Castle。
正面望落去幾型幾威㗎。
btw 呢度又係包場。
呢個城堡其中一個特色係真係有個「護城河」 (WE HAVE A MOAT!!!)
個城除咗前面好睇，後面其實係爛晒嘅。
不過爛有爛嘅趣味。我望住啲爛咗去唔到嘅通道，覺得似曾相識。
似咩呢？我諗咗好耐。
應該係呢個，除非唔係。
其實 Caerlaverock Castle 雖然個門面好似好勁，但入面真係一個「比較大啲嘅石莊」。前面介紹都話，Edward I 攻城嗰陣，入面得 60 人守城。（其實呢個故事都直接顯示咗當年英國嘅規模。英王親領士卒三千，攻打一個細細粒，得六十人守衛嘅石莊⋯）
Caerlaverock Castle 原來仲有一個前身 (version 1.0)，得返個地基。
城堡養咗幾隻可愛嘅牛牛⋯
之後就走去睇燈塔。
「蘇格蘭最南嘅地點」
點解影多咗架車呢，因為佢先至係今次行程嘅 MVP⋯
黃昏揸車去酒店。 Glasgow 嗰頭。
三個鐘。
今次嘅酒店 checkin 就發生咗件幾有趣嘅事。
間酒店話係 small family business 嚟，似乎唔會有 24 小時 reception service，所以有少少趕。
一入到去，老闆喺 reception，問我係咪經 Agoda 訂，我話係。
之後佢就話，我哋直接收你錢，你喺 Agoda 嗰邊退訂啦。
我望住佢心諗：吓？！咁都得？
我心諗嘩啲印度人真係咩都做得出。
由於呢晚嘅床被佢 hold hostage，我心裡面雖然屌晒十八代社宗，但發牌氣只會令件事更差，唯有死死地氣裝 Agoda app，搵佢個 CS 電話出嚟，然後打過去同 CS 搏鬥。
搞咗十幾廿分鐘，Agoda 確定係酒店嗰邊唔肯退讓之後，退咗訂。我聽住佢哋同老闆大戰，老闆不斷重申佢之前幾個客都收唔到錢，所以 DLLM 我唔接客喇，你哋收皮啦。
我本身以為佢哋連 Agoda 嗰少少中介人費都貪所以先搞咁多嘢，原來係有咁嘅 backstory。好彩之前冇發爛渣屌鳩個老闆唧。
搞掂退訂之後，我問個老闆，喂，究竟邊個咁衰唔俾錢你？如果 Agoda 咁衰咁應該用邊間先好？
原來個問題唔係出在 Agoda 身上，而係中介人背後仲有中介人。呢間酒店叫做 "Lochway Hotel" 但網上訂嗰陣就係見到 "OYO Lochway Hotel"。似乎 OYO 係個酒店 franchise 或中介。老闆話 OYO 從中搞鬼，食夾棍。 Agoda 啲錢會先去咗 OYO 度，但酒店就收唔到 OYO 嘅錢。
之後再對返 OYO 同酒店開嘅價錢，真係俾佢吹漲。酒店嗰邊見到係一晚 ~£80 左右，但我喺 Agoda 嗰邊訂房係 £68.36。我俾 £68.36 ，酒店邊可能收到 £80 呢？最後我見件事咁尷，過咗 £70 俾酒店。希望佢做我呢個客嘅生意唔係蝕錢啦⋯ :'(
呢個故事教訓我哋做人要俾啲耐性，眼前人未必係你想像中嘅仆街嚟。
No comments:
Post a Comment