Day 7

今日走出倫敦，所以第一件事要做就係租車。

訂咗去 Avis 租，為咗方便揀咗倫敦市中心嘅分號。唔知係咪倫敦獨有，佢本身預咗架棍波車俾我。我個牌係揸得，但我唔識揸棍波 :0) 最後要加錢轉自動波車

逃出倫敦嗰下有啲驚險。本身我已經係揸開左軚嘅雪藏牌，忽然要喺倫敦鬧市揸係越級挑戰。一轉出去就差啲入錯線 (自辯：嗰個位係好撚 fake)。我一邊跟住 Google Maps 指示揸，途經過一啲因為有車泊咗喺度所以超窄嘅位 (左右 leeway 應該兩尺都唔到，我估一尺左右)，我心諗難道呢啲真係倫敦嘅日常⋯

好唔容易逃出咗倫敦，第一站係 Stonehenge。

之前網上好多傳聞 Stonehenge 可以「唔俾入場費」，我早幾日金睛火眼睇咗一大輪，個結論係 Stonehenge 個圍欄外都見到啲石，同「場內」個行人路距離都好近，差嗰幾米好多人覺得唔值俾咁多錢入場。如果係本地人角度咁都啱嘅，不過我既然已經俾咗機票錢酒店錢租車錢油錢去個咁遠嘅地方，交多幾十磅入場費都唔係咁緊要，最緊要係確認可以用最好嘅情況下睇到個景點。所以，我決定用錢解決問題。

後來都證明個決定係正確嘅，起碼俾咗錢入場可以環繞場內先個圈，欄外嘅只見到一個面向。同埋最緊要係嗰頭冇位泊車。

俾錢條路(右) vs 唔使俾錢條路(左)

實地考察，講下附近環境。

基本上附近全部都係牧羊嘅草地，老婆望咗幾眼啲石就走去撩啲羊。（可憐地被無視）

石陣個位置又唔多似係高地或低地，附近有少少起伏但都係相對平坦嘅草原。

石陣外圍有啲「溝」(ditches)，據講係以前建築群(complex)嘅一部分。另外原來呢個範圍係有啲大石嘅，呢樣我就真係本身唔知。

我坐咗喺附近嘅草地度，感受下陽光、風、土地。食咗一小片草，算係同大地掛上咗聯系。

下午去 Bath。

Bath 最出名就係個污糟水池。我哋去到先知道原來佢係有個泉水嘅。本身仲以為係一譚死水。

同埋佢哋有個小博物館展示啲羅馬時期嘅嘢。

望住地基嘅石，好多都係整整齊齊嘅大型方塊石頭，令我心思飛咗去埃及嗰邊。係有嗰種味道。話說好多時啲建築都係喺上一代嘅遺址上興建，所以底層嘅係唔係羅馬人整真係好難講。

最後，飲咗啖泉水。

最後，喺 Bath 個鎮度兜咗個圈。打咗個卡。唔知呢度係乜，但聽聞幾出名。

之後揸咗三個幾鐘車 :)

講起揸車就火滾，我一路揸，一路心諗：點解不斷喺人哋嘅田園牧場入面兜圈嘅？

停低，望返 Google Map 條路線，屌咗出聲。正常係應該喺 M4 轉 M5，但 Google Map 話 M4 唔知係塞咗定有路障，所以就叫我穿過人哋嘅鄉鎮，碌過座山走入 M5 度⋯

要行啲雙程窄路，經過啲要慢速嘅村仔，真係 !@$#!)$%@!@(%$*!

話說呢啲特登頂住入村嘅車嘅裝置，其實係有咩作用？自動車流管制？

Anyway 我哋一日揸咗二百幾接近三百英里。Yay。

去到 Liverpool 以北嘅一個公路旁嘅旅店過夜。聽日遊 Lake District。

btw 個旅店其實主要係一個酒吧。個旅店喺後面嘅一個小屋，好似得十間八間房咁。