Day 10

Glasgow 一日遊

本身諗住去個 Pollock Country Park 行下，但各種原因改變計劃。

去咗間大型 shopping mall 行街。叫 "The Forge Shopping Centre"。算係幾大，入面都好多舖頭。

發現咗個機舖，有個唔算太舊嘅 DDR 機，玩咗一舖，啲制冇壞，唔錯。

其實平時我喺香港冇玩嘅，通常都係喺外地偶遇機舖先會玩下。

除咗行 mall 都行咗陣附近嘅街。 Glasgow 街頭感覺係頹頹哋，啲建築好舊。

午餐叫咗太多嘢。牛肉汁薯條、牛肉 meat pie、black pudding egg benedit，勉強食唔晒。

間餐廳感覺係 "family restaurant" (日本概念) ，啲嘢算抵食同好味。

臨食時老婆買咗隻牛牛公仔。我哋今程發現啲精品店好多明顯係 AI 圖 gen 出嚟嘅精品。有啲係 AI 到十分詭異。（好心用啲好少少嘅 model 整啦⋯

另外，發現架車原來係殺蚊高手：

真係痴撚線。

下午去咗個威士忌蒸溜廠。

The Clydeside Distillery 呢間嘢話舊係舊，但其實係新嘅。

個建築有兩百年歷史，以前 Glasgow 個港口好多貨物進出嗰陣，呢度係港口控制船隻出入嘅建築。 兩百年後，喺 2017(?) 年改建成蒸溜廠。

喺酒廠買咗支酒。又試咗少少佢哋嘅 new make spirit (啱啱蒸出嚟未熟成嘅嘢)。有陣醬香茅台味。老老實實我覺得就咁飲係冇問題，唔明點解要熟成 XD

之後揸車去 Oban。由於反應唔切行錯路，搞咗一輪都上唔到公路。（一定唔係因為徵醺）

行上公路之後，一直經過幾個好靚嘅大湖。有幾個位可惜冇落車影相⋯

黃昏去到 Oban。啱啱日落。

呢個係酒店嘅景。

機不可失，我就攞住啲相機s去影夕陽。

個鎮仔係幾靚嘅。

是日晚餐又係炸魚薯條。今日薯條 overload。