先知力

我忽然留意到一個好得意嘅問題

絕大部份有通靈能力嘅人嘅運作係以濟助世人嘅模式運作。以身體作為媒體，以問答模式開放俾世人使用。由於世人所求千奇百怪，所以呢種靈力係好廣泛同隨興嘅，唔係話鑽研某樣嘢就可以加深嘅能力嚟。

由於我對世界所有嘢都有種距離感，所以我係好難行呢種模式。

我平時使用嘅「先知力」，通常係需要自己長時間浸淫喺某個範疇，少則一年半載多則十年八載，係要以理性分析大腦思維為框架，熟悉咗件事情，然後再做判斷就通常冇錯。若果夾硬講其實無所謂靈力，可以話係純粹用大腦理性思維模式就可以解釋到件事，但事實上我啲結論通常都同大眾所得嘅結論迥異，所以我都唔知算係點。 但有時啲嘢的確係無得用理性解釋嘅，例如細蚊仔嗰陣估到人哋麻芝菇出乜 (其他猜拳遊戲完全估唔到)，中學時可以OK準咁估到比賽結果，大個揀 tech stack 全部都最後跑出咁滯 (i.e. 唔會上錯車做夕陽工業)

所以照計真係需要少少先知力嘅。

但喺熟悉嘅範疇以外，我係完全唔得掂嘅。每一範都要三五七年先摸熟，在此之前係連初學者都不如，但通咗嗰下就會忽然去到可以自成一家嘅水平。中間嗰下跳躍我係成日都唔明搞乜鬼嘅。

近排學啲靈性嘢、玄學嘢之類開始遇到少少 plateau，啲嘢聽嚟聽去都係差唔多，好多甚至離唔開我十年八年前寫嘅文嘅範圍。(當年寫嗰幾篇文真係靠先知力。不過都係要我諗咗呢啲問題十幾年摸透咗宇宙真理⋯)

如果我對世人有多啲「愛」我可能可以試下做下「媒」，「媒」個特性係會感受到個人嘅能量唔同咗。但而家個感覺係啲「先知力」係純粹靠「自己」。

可能通靈都有千百種唔同方法，純粹好奇下其他人係點。