氣場

以前例如落大雨搭車塞車，總會有種浮躁嘅感覺。啲水撥聲，啲車爭攝位偶爾響咹，諗起都覺得煩。

唔知係咪心理作用。

後嚟涉獵咗一堆非唯物主義主觀世界嘅資訊，就開始懷疑自己係咪感應得到周圍嘅「氣場」或「氣氛」。始終，我就淨係搭車，照計落唔落雨，條街有幾塞車，其實真係唔關我事，本身冇咩理由走去同人煩埋一份。

-

好多人話日頭做嘢有效率啲，工作上我基本上都係咁，但我寫文永遠都係半夜開始先至有輸出。

係夜晚先至夠「靜」。

諗落呢個「靜」嘅概念都幾得意。所謂 "buzz of the city" 係真嘅，你去寶雲道散步就明。一邊係煩華嘅灣仔市區，另一邊係深山樹林，對比之下，其中一邊啲雜音係超嘈。

但我屋企何嘗唔係咁？呢一刻（半夜）風扇抽濕機齊開，分貝嚟計一啲都唔算「靜」。但我係好明顯「感受」到整個城市嘅人去咗瞓覺，周圍少咗好多「能量」，真係「靜」咗好多。然後我寫文字嗰陣，就好似少咗干擾，甚至好似少咗世俗眼光嘅顧慮，可以比較暢所欲言咁。

講開又講，最近有個諗法係查返我啲最腦洞大開嘅文，睇下同月亮週期有冇關係。但呢啲嘢有少少煩，睇嚟都係好得閒先再做。

-

日本有句說話叫「空気を読む」，有時見啲香港人都會引用，話啲人唔識睇情況做人。我自己就好唔鍾意呢種概念，始終唔講明嘅嘢，大家睇到嘅重點同細節都唔同。歸根究底，「空気を読む」係一種利用大腦做分析嘅行為，但我上面提及嘅「感應氣場」，大概係一種極之輕盈，若有若無嘅情緒感覺嚟。唔係留意任何細節得出嘅結果嚟。講真，我到呢一刻都唔係好肯定呢樣嘢係唔係所謂「心理作用」。 (字面上一定係「心理作用」，主觀事實入面嘅心理作用係有「真」效果嘅，不過我就係連呢樣嘢有幾真都唔係好感講。例如話，係咪我迫自己習慣朝早九點寫文，都一樣會寫得出同樣嘅嘢？）