舌頂上顎

我唔係專家，以下只係講下個人經歷。

十幾年前，喺網上道聽途說，開始靜坐練氣。我用嘅方法好直接，就係靜坐用意念將啲氣喺身體各部位推嚟推去。穴道嘅嘢我唔識，但啲氣可以運走嘅管道，大概就係經脈。下盤聚氣，其實好易就貫通督脈 （脊椎嗰條）直達頭頂。任脈大概就係前面嗰條，由面部去到小腹。啲人話「打通任督二脈」就會有神通，我暫時就唔覺得有咩特別。不過我任脈都唔係好暢順，好多時啲氣聚頭頂散唔到，有幾年我就偶爾會有啲若有若無嘅頭痛。

試過幾次強行將頭頂嘅氣壓落去，然後眼鼻牙就會有啲「神經過敏」積像，眼易累，鼻入面去到喉嚨椗痕癢，好似就嚟想嘔咁。最誇張係門牙痛。我諗咗幾日係蛀牙定係因為氣塞導致嘅「敏感」⋯ 不過都只係痛咗一兩日，所以應該唔係註牙。

所以實驗證明以下係唔通嘅管道：

- 鼻 -> 唇 -> 門牙 -> 下巴

- 鼻 -> 鼻腔 -> 喉嚨

後嚟點樣解決？最後係舌頭頂上顎，配合吞嚥嘅動作，將啲氣由鼻經上顎舌頭導入喉嚨。自此以後啲奇怪「神經過敏」現像就少咗好多。

所以呢，有時見啲人討論坐禪條脷點擺，其實可能你冇呢啲問題就真係唔需要太理會。呢啲術式(?)嘅來源大抵都只有兩種： (1) 反覆實驗之後發現某方法可以解決某某問題 (2) 神仙授予，冇得解但有效。 暫時睇嚟舌頂上顎係 (1) 呢種。