投資嘅能量

其實我一直都對自己坐擁唔算細嘅資產感到唔係好自在 

(...多謝你哋嘅好意但唔使喇多謝 [見下])

話晒古今中外各位老師都唔係好鼓勵守財奴，話財富要分享先有意義，最好散盡家財，唔係淨係用喺自己身上。

但呢幾日我再從豐足(abundance)嘅角度諗多幾下，發現現代人處理資產原來同古代嘅「守財奴」係好唔同嘅玩法。

以前啲人嘅資產基本上係 commodities (包括金幣銀幣) 同 土地，同人「分享」嘅方法唔多。如果唔係「散盡家財」嘅玩法，大概就係借出去(錢)或租出去(地)。  但由於借錢風險比較大，我諗最多都係將土地租出去。

但現代金融體制令到發放資產嘅玩法多咗好多。例如所有形式嘅「投資」（唔係投機）理論上都係一種「送錢出去俾人（做生意）」嘅形式。

可能會有人覺得「投資」有錢賺唔算做「善事」，所以就唔會有傳統意義嘅「積德」嘅效果。我唔知炒股有冇「積德」，但如果用一個比較現代啲嘅「能量流動」講法，掉啲錢落股票市場確實係一種極有效將資金能力流動嘅方法嚟。而你實際上做緊嘅嘢，又確實係將你用唔著嘅財富交俾其他「更需要」呢筆錢嘅人 (假設你入貨個價位夠低)。至於投資好多時賺返有凸呢樣嘢，其實唔係負面嘢嚟，反而可以係豐足嘅一種體現。始終「倒錢落海」形式嘅「積德」實在太過 zero sum，實際嘅操作稍為有種「懲罰」成功搵到錢嘅人嘅鄉愿感覺。如果我哋唔係習慣咗妖魔化「貪念」呢樣嘢，其實你分享財富出去，梗係想對世界有最大正面效果(EA撚散退！)，而「投資回報」都算係一個幾合理嘅 metric。

我唔係否定嗰啲「散盡家財」嘅玩法，只係講緊現代社會有啲新嘅方便玩法，仲係反 zero sum 反誅心論 (i.e. 貪) 嘅豐足玩法。

That said，既然能量呢家嘢部份取決於心態，我就好懷疑嗰啲短炒、玩牛熊證之類嘅玩法包唔包喇。