隱几而坐

《莊子》其實係咪真係人類「睇得明」嘅嘢嚟？

當然啲字有傳承嘅解釋，但啲人真係睇得明㗎咩？ (所以可能要撈埋郭象莊子注一齊讀先得，如果佢都講唔通即係其實真係唔會睇得明 https://ctext.org/library.pl?if=gb&res=5376)

淨係「隱几而坐」呢四隻字我已經搞到一頭霧水。

先睇本義，「隱」字應該係「收埋」咁上下嘅意思。喺呢個語境下本身係 make sense 嘅，因為可以係收埋張凳，坐地下咁嘅意思。亦同後世打坐嘅方法一致。

但傳承解釋似乎係「隱者穩也」或「隱者憑也」。「隱者穩也」都明，但唔通順，尤其後面一再重申「今之隱几者，非昔之隱几者也」，更加係唔知講乜。至於「隱者憑也」，我一時搵唔到理據，可能係因為《孟子》有句「隱几而臥」，咁可能真係要解「靠住張凳訓著咗」咁嘅意思。

個問題係，好地地做咩個個都寫「隱几」？貪得意？真係一個謎。

由於近排研究緊魔法，都會涉獵到啲傳統修練技巧。莊子講打坐冥想，梗係盡量想明佢講乜 （唔似得啲文人解咗啲字就算⋯ [反正佢哋都唔會攞嚟練功...]）。咁「隱几」即係點坐法真係好重要，尤其係佢輕輕帶過就轉移話題，好似冇咗下文咁。唔知係咪又俾人 cut 走咗⋯ 篇嘢講冇兩句忽然話鋒一轉講天賴，然後就變晒啲抽象嘢。（呢個人相當有嫌疑！！係咪成卷修練內功嘅竹簡夾帶私逃咗！！）

本身點解會痴起條根睇《莊子》係 Threads 有人講起「道家打坐肯定係抄印度」，我隨手引咗嗰段齊物論話「可能唔係抄呢」。然後我心思思想睇下佢實際有咩內容，就變咗咁樣。

最最最搞笑嘅係，由於睇唔明《齊物論》嘅「隱几」嘅打坐姿勢，查完一輪冇結論，無奈之下走去重操故技諗下係咪音譯⋯⋯ 屌你吖，「隱几」同 "Yoga" 真係啱音。然後「今之隱几者，非昔之隱几者也」就忽然解得通。

你話係咪開玩笑。