23 Nov

最後一日。因為夜晚要搭飛機，所以都冇咩 plan 行程，費事 pack 得太緊趕唔上飛機。

點知最後都好趕。

朝早懶洋洋咁擺低行李之後，發現舊同事Z原來喺淺草附近。我 msg 佢話「你俾個地點嚟，我三十分鐘就到」 XD

最後發現佢排緊隊拜神 （條人龍真係好長），咁我哋見條隊其實都會移動嘅，就跟住一齊排。

鷲神社酉の市，好似主要係求生意興隆之類。我就擺低咗五円，但應該就冇咩關於生意嘅嘢嘅欲望，純粹有緣就打下招呼咁。

之後一齊食咗牛舌燒和牛燒章魚燒，都好好味。尤其和牛燒真係好正。

之後走咗合羽橋道具街。點解佢哋知我啲喜好嘅呢？好彩/可惜係我行李爆晒，否則可能忍唔住手又買一堆嘢返去。

然後，就走去搵另一位舊同事 (舊上司)。嘿嘿，佢住間酒店就真係華麗到呢⋯ 我真係未見過咁浮誇嘅酒店。睇返啲房價，咦原來又唔算好貴咋喎。望佢個款其實似係搞 events （講座、開會、結婚、等等）多過係做酒店生意。

幾年冇見，傾咗一大輪計。之後就出發去機場喇。走嗰陣見到啲人係咁影相，望返，原來係日落嘅富士山。

去到機場。一般嚟講就冇嘢好講，但臨上機之前，我竟然因為走去七仔買支水，搞到差啲唔見晒啲行李同部新買嘅 iPad... -_-

我只能夠講，蘋果嘅 Find My 同 Separation Alerts 真係好有用⋯ 我差啲懶得認真 set 個 alert，好彩最後搵得返⋯

之後上機，吖，仲有個有趣故仔。

坐咗走廊位，窗口位係個後生女仔。

坐到咁上下，我見佢係咁向出面望，又用手機拍拍拍，就開口問佢有咩睇。

佢話：好多星星呀~

然後就俾我睇佢拍到嘅星星。

話說 iPhone 可以較曝光率然後告連續拍片去影啲暗嘢，只要你手夠定，理論上同相機長曝光嘅效果差唔多。

咁喺飛機呢，有個問題係飛機本身有啲光 （已經熄咗主要嘅燈但都係有少少光），啲玻璃會反光，另一個問題就係要搵啲嘢定住佢。最後我哋試完之後發現，用飛機窗上嘅窗幕，啱啱好可以遮晒啲光，兼且定住部機，而只要你唔拉晒落嚟，仲啱啱好可以俾你撳手機嘅掣，如下：

我部機影出嚟就咁樣：

但人哋用 iPhone 15 Pro Max... 真係一分錢一分貨：

靚到癲。

我最後偷咗佢張相，擺上 FB 呃 like :D 

佢俾我個 vibe 都係幾好人，如果我後生幾歲可能真係會同佢搭下訕傾下計，但目測應該會有代溝，都係算喇。