22 Nov

朝早去築地市場。一去到就見到個本願寺，打咗個卡。貌似係有啲學生活動，勁多中學生小妹妹。築地市場冇想像中咁特別，食咗個海膽三文魚子吞拿魚飯做早餐，啲海膽味道好鮮甜，係唔錯嘅。之後行咗啲少人啲嘅街（都係築地），基本上係街市嚟，買咗好多嘢。擺咗啲嘢去銀座嘅locker，然後出發再戰川越。

川越原來都好多人。尤其係多中學生（應該係school trip）。條商店街一直行半個鐘都仲有，真係好犀利。搵到間醬油雪糕台，但啲嘢好似冇上次食咁重醬油味。但啲雪糕係好食嘅。

喺附近食咗個烏冬加野菜天 天ぷらset，味道唔錯。係有少少飽，個雪糕本身有啲飽肚。之後返程唔想再行本個鐘商店街，就搭咗巴士。

下一站係池袋。本身池袋冇咩特別吸引，但老婆講咗咁多次總要去下。見網上介紹主要都係女性向嘅嘢，終於明白點解佢咁鍾意池袋。由於下午四點幾約咗接主席放工，所以都只能夠跑馬看花咁隨便去Pokémon 專門店望兩眼。我順手喺隔籬買咗啲snoopy 公仔。

之後趕去接主席放工。途經皇城東南，影咗幾張相。然後路經咗附近嘅公園。

主席帶咗我去返個園，入咗夜冇咁多嘢睇，都係頭先開心啲。然後去返皇城東面入口，近少少打多咗幾張卡。主席話係windows desktop嘅相，但我冇見過。夜晚個景都好靚。

之後搭巴士去咗東京鐵塔。主席話有個打卡位，我哋跟住網上某個指示喺停車場轉出嚟，果然見到有人喺度打卡。我哋打完卡之後，行返上樓梯，發現原來有成廿個人等緊，我哋唔覺意打晒尖⋯

之後去咗食飯。我話想食多啲菜，主席就搵咗間食 salad pasta 嘅西式餐廳 (我呢程食咗好多日式西嘢⋯) 唔覺意叫咗個時令秋季五式雜菌(菇) + Salmon 嘅意粉，意外地好味，完全唔覺得好大陣磨菇草味。（按：我平時係唔多鍾意食菇嘅）真係好神奇。

之後走咗去東京火車站打卡。主席話「東京站好似（香港嘅）大館呀」，我心諗你講乜鳩？之後見到實物嗰陣先至明，原來係講緊百幾年前嘅歐陸紅磚建築風格。

主席有少少不滿我好似覺得佢特登帶我嚟睇但我好似覺得件事好普通咁。我之後搵咗張相俾佢睇：

呢度係以前「屋企樓下」，但諗諗下原來我喺兩間法定古蹟返過學 :0) ，coed 略為新少少，好似仲未成為法定古蹟 (好似係二級歷史建築)。睇返香港啲歷史建築法定古蹟清單，發現我由細到大作為「街坊」咁日日經過嘅都真係唔少⋯