朝早再戰新宿御苑,終於九點鐘入場。一開始人少少有啲包場嘅感覺。真係好靚,唔明上次班友仔匆匆忙忙下晝三四點入去打卡係為乜。
由於之前兩日行得太多,有啲攰,所以就喺腳膠之庭度足足坐咗半個鐘。冇人。
之後本身諗住去川越尋找醬油雪糕,仲去咗一半路去咗和光市諗住兜個轉再轉車,點知喺和光市發現間醬油雪糕店當日定休,所以就疊埋心水喺和光市兜耐啲。網上介紹(日本語)和光市附近有天然溫泉,不過唔近火車站,咁我就行咗四十幾分鐘過去。由於地方隔涉,間溫泉都係本地人光顧。本身諗住平日下午兩點唔會有咩人,但原來佢出出入入生意都好唔錯。佢除咗有溫泉,仲有一堆遊戲機,同埋啲親子遊樂場。幾得意。浸溫泉嘅絕大多數都係年紀大過我嘅日本伯父。anyway 沖涼同浸溫泉都好舒服。不過浸完又要行返四十幾分鐘出去,都真係幾攰。
今次揀咗條好少少嘅路(往程主要係行公路則),多啲本地嘢睇。見到有自動賣菜嘅櫃,幾得意。買咗啲食物諗住食,包括個海鮮gratis,點知唔記得要餐具。(最後成為兩日後嘅早餐)
離開和光市就去咗銀座,望下冰俾我嘅伊X文具店。唔識睇,不過就事但買咗啲嘢。銀座其實真係冇咩好睇,最後望住網上介紹(日本語)話歌舞伎座可以買啲「一幕席」,咁我就走去碰下運氣。去到嗰陣六點,買到八點飛,所以就喺附近搵嘢食。見到個叫咩FARM TO GO嘅餐廳,主打時令農作物,就走咗入去。都幾好食,啲菜有菜味。
之後去睇表演。個場好似個opera咁,好大。本身驚聽唔明啲歌劇,但佢原來主要係舞樂。舞伎主要都係舞,另有俳優奏樂唱歌。第一幕係兩男一女,貴族服裝,一出場我仲以為係公仔嚟,俾佢完全驚艷咗。尤其女服飾真係好靚,靚過啲公仔咁靚(諗起套變裝娃娃)。之後兩幕嘅服飾都係平民,一個係漁夫,一個係普通讀書人?冇咁艷麗但都好睇。
睇完都九點幾
No comments:
Post a Comment