投資

最近無聊起嚟拎起 Ben Graham 本 The Intelligent Investor 嚟睇。

Ben Graham 係專業嘅資產管理者，佢話用佢啲方法投資，可能會比市場贏多幾個巴仙，講緊嘅係好大筆數入面好穩陣咁比一般人賺多啲，當然係好勁。

但，我望返自己，甚至大部份人，其實每年多幾個巴仙係咪真係差咁遠？用返傳統財金佬𠱁人買基金嘅講法就係，啲錢越滾越大(compound interest)，十幾廿年後就會好大分別。呢個固然係事實，但相對於人生大部份嘅決定，呢啲單位數%嘅影響，好多時係微乎其微。

人生最大嘅投資，通常都唔係錢，而係生活裡面佔最重要比重嘅嘢。細個就係學業、朋友；大個就加埋事業、婚姻。點解我感慨到要開個 post 特登講，就係啲金融才俊九牛二虎之力又 diversification 又剩，先賺多幾%，但正常人生活最重要嘅決定，幾乎全部都係(被迫) all-in 嘅。學業 all-in，最多咪讀個 double degree？工通常都係每份工做幾年以上，唔會同時做幾份；婚姻更加係冇得唔 all-in，預計綑綁成世。（香港人多樣嘢：買樓都係成副身家 all-in）以上幾樣嘢，每一樣都影響緊你人生包括身家總值唔只幾個%，但好少人會純粹用金錢回報計數。冇夢想同條咸魚冇分別？係都要講咩個人興趣呀、愛情呀，懶係冇咁俗氣。

對於大部份人嚟講，你揀嘅工作、行業、公司、老闆， 對你嘅收入嘅影響先至係最大；而你揀嘅伴侶同朋友，對你嘅支出嘅影響先至係最大。如果你連最大嗰條數都唔係咁 care 金錢回報率，例如娶個老婆返嚟有 30% 機會廿年後身家俾佢分走咗一半，或者拒絕咗個二世祖追求同個窮撚結婚 opportunity cost 三千萬，咁結婚之後你走去買個儲蓄保險，佢同你講最高年回報有 3% 定 4% 其實係咪真係咁大分別呢？

所以某程度上，Ben Graham 徒弟 Warren Buffet 推薦嘅投資方法可能更加切合普羅大眾嘅實況：搵啲值得投資嘅嘢，all in，長揸。而「值得投資」嘅嘢唔多，一世人可能得幾次機會，要好好珍惜。