舊酒新瓶

本身我唔係好跟時事，舊年 NFT 熱潮推到癲瘋嗰陣，有朋友問起，我先臨急抱佛腳走去望咗兩望究竟係咩嚟。NFT 技術上大概係乜我就有少少頭緒，不過實際上點解會有人肯為咗個 token 俾成千上萬，我就一直都唔明。雖則話 crypto 嗰排水浸，有班暴發戶亂咁揈錢，但我心諗都未至於解釋得晒成個熱潮嘛？

直至最近，諗起傳統 fine art 市場。

原來又係舊酒新瓶。

點解一幅「名畫」可以值幾百萬？本身搵個畫師臨摹，貴極都唔使嗰個價，隨時搵個夠撩倒嘅，一千幾百有找。啲「名畫」嘅價值其實都唔係在於藝術品實物，而係作品背後嘅「故事」。咩「X畫家唯一傳世真跡」、「Y畫家臨終時最後作品」，呢啲喺外人眼中都係虛無縹緲嘅嘢，支撐咗啲「名畫」大部份嘅「價值」。大家都相信佢好值好貴，所以就值好貴。

睇返呢啲吹水嘢，同 NFT 比較，真係完全冇分別。

至於 NFT 係咪呃人，就好似我畫張圖，我話佢賣一千蚊，咁係咪呃你？

《勇者打怪圖》筆者畫

都係願者上釣㗎啫。

如果我話「遲啲市價會更貴，有人會用一萬蚊買㗎」咁就真係呃鳩你喇。