蛋黃撈蛋白炒飯

上回提到先煮蛋白再撈蛋黃嘅炒蛋方法，今次 show 返張同用樣道理整嘅炒飯。



望落去冇咩特別，但食落有少少「雞蛋撈飯」嘅感覺，真係好好味。當然，今次用咗啲疑似係「雲南（買嘅）火腿」嘅鹹肉嚟整，仲要落得唔少，偏鹹，但我不嬲唔介意啲嘢食重口味，本身食剩一半，啱啱忍唔住都係食埋先瞓。

記返低啲食材先：（包裝）木耳榨菜絲、另再加多少少黑木耳、鹹肉、蛋、油、飯。

雙色炒蛋

是咁的。最標準嘅炒蛋，係將蛋白同蛋黃完全打渾先再落鑊炒。我一直以嚟都係咁做。

不過最近發現，如果先好似整太陽蛋咁將啲蛋白炒熟(其實「炒熱」就夠，煎透咗反而唔掂)，然後先再撈渾蛋白同蛋黃，最後炒出嚟嘅蛋兩色分明，蛋白啱啱熟，蛋黃半熟，可以更加帶出蛋黃嘅香味。我自己唔多鍾意太陽蛋，因為唔鍾意啲蛋太生；荷包蛋好啲，但成舊蛋黃未熱過嘅感覺都麻麻。不過如果先將蛋黃炒熟，之後先撈蛋黃，咁就可以控制蛋白同蛋黃有幾熟，有炒蛋嘅感覺之餘有太陽蛋嘅質感、荷包蛋嘅味道。

技術好啲嘅，蛋黃同油撈埋會再有啲神奇作用，有少少蛋黃醬嘅感覺。蛋黃醬撈炒蛋白咁樣，都幾得意。

諗過下叫咩名好，不過唔知點解都係負面居多，咩血肉模糊骨肉分離啲friend。

可能就咁叫雙色炒蛋就算。

順帶一題，呢招用嚟炒飯都得。今日試過。啲炒飯本身有啲太鹹，食落去竟然有「鹹蛋黃」嘅錯覺。可能如果真係隔開蛋黃落鹽醃幾下先落鑊炒，真係會變鹹蛋黃味道都唔定。

蘿蔔糕 take 2

舊年第一次認真整蘿蔔糕，不過一直都搞錯粉同水嘅比例，啲糕變得水汪汪。

今年痛定思痛，記住咗最重要嘅秘訣：一底糕起碼要 300g250g 沾米粉。啲糕未蒸之前要係半固體狀。

其他料嘅份量就好隨便。大概就係將啲粉以外嘅材料炒香佢，然後用水開起啲粉，落鑊慢火撈到佢少少凝固，之後拎去蒸。

相中嘅糕啱啱蒸好，應該等佢攤凍先再食。不過忍唔住，食咗啲。好撚正。

順帶一提，出面連鎖店買到嘅蘿蔔糕真係垃撚圾，自己整其實唔難，我呢底糕都只係搞咗一個鐘啫。

最辛苦嗰 part 係切臘腸。屋企用開嗰把唔利嘅菜刀完全切唔到臘腸，所以攞咗把旬刀出嚟用。雖然新刀好利，但因為臘腸硬，都要啲臂力。不過把旬刀本身唔係用嚟切肉嘅，用力嘅時候個 grip 麻麻地，可能真係要搵返把重少少嘅文武刀先得 :(

參觀蘋果園

舊老細瓜柴到依家已經有七年光景。

仲記得當年小Jobs子病入膏肓嘅時候，佢仲走上 Cupertino City Council 講解新總部嘅計劃。當時我諗，科技嘅嘢日新月異，幾年後我喺邊都未知，到時我仲喺度做先再講啦。

七年時間轉眼即過，舊同事走咗大半，估唔到我仲喺同一間公司做緊同一個 project。

新總部係最近先開放俾一般員工參觀。早兩個月我上司嘗試帶我去睇睇，但門口話按規矩閒雜人等唔俾入，無功而回。轉轉折折咁多年後，我最後仍然以員工身份走入新總部，感覺不免噫唏。

本身我對新總部最深嘅印像，係佢好似宇宙船嘅辦公室大樓，但一行到入去，發現原來都真係不枉「Apple Park」個「Park」字。嗰笪地雖然有一個巨型辦公室大樓，但絕大部份地方都係園林：有果樹，有加州本地嘅嘅草木，有水池，有小山丘。行到入去，感覺好似離開咗「矽谷」，走咗入一個寧靜芳幽嘅公園，遠離鬧市嘅繁囂。古詩有云：向晚意不適，驅車登古原；夕限無限好，只是近黃昏。唔係吹水，有相為證呀。

有時啲嘢真係好難用文字解釋。矽谷心臟之一嘅 Cupertino，雖然人唔算多，但周圍滿佈辦公室，日間車來車往，附近嘅公路更加係燥音不斷，你好難感受到大自然喺身邊。但入到去蘋果園，真係忽然進入咗一個寧靜庭園嘅感覺。環顧四周，真係見唔到附近市區嘅蹤跡，淨係見到草地、樹木、同埋遠處嘅高山。睇嚟設計者刻意用場內嘅人工土丘，將附近市區嘅景物遮掩，營造一種身處大自然嘅錯覺。當然身處大自然係真，但兩百米外就係遊客穿梭嘅 Visitor Center 同埋蘋果商店，假像仍係假像，不過足以亂真。

網上睇相，同親身去到實物面前，真係兩種唔同感覺。縱使附近就係鬧市，但呢一刻呢一處，卻似係世外桃源，前面係一棟潔白無瑕，偉大而嚴肅嘅建築。我本身唔係一個特別鍾意睇建築物嘅人，成世人冇乜俾建築物感動過。但企喺一塵不染嘅 Steve Jobs Theatre 外面，忽然覺得，整個建築物外部，就好似一個 "shrine" 、一個「神殿」噉樣，紀念住某一個時代嘅某一個大人物。

走入去辦公大圈圈嘅裡面，大概即係俗語所云嘅「核心嘅內圍」。嗰度有一列一列嘅蘋果樹。話說「矽谷」本身係種果樹嘅，不過我今日先知原來蘋果公司有種蘋果。整個蘋果園嘅草木，都好有加州本土特色。喺我呢啲東亞人眼中，加州本土草木，望落去真係好似沙漠嘅植物，真係唔算靚。不過呢啲設計有地理嘅限制，加州本身乾旱，如果要養啲比較「濕」嘅植物就要浪費好多水，所以都真係冇乜計。

喺內圍兜咗轉，望過啲飯堂，喺水池邊坐咗一陣，喺外圍兜返出嚟。咁樣行下又停下，已經大半個鐘。加州嘅人揸車多，好多人步行不足，喺一呢個大飛船嘅辦公室度做嘢就真係冇呢種煩惱。淨係行去飯堂都要好幾分鐘。我見到好多人踩單車，我諗係用嚟喺公司內代步，而唔係用嚟由屋企往返公司嘅。入夜之後，公司室內嘅白光更顯得耀麗，如果我認真走去睇辦公室內嘅白板寫咗啲咩，去睇啲人嘅 mon 顯示啲乜，應該真係會睇到。唔知喺咁多透明玻璃嘅辦公室工作會係咩感覺嘅呢？我應該唔會知道。

行完一轉出返嚟已經日落。夕陽無限好，只是近黃昏，真係唔係講笑呀。

21 Lessons for the 21st Century

I'm sort of a fan of this author. His first book "Sapiens: A Brief History of Humankind" had a couple of insightful interpretations of human history. His second book, "Homo Deus: A Brief History of Tomorrow" was a wild exercise of speculating the future of humanity, which sounded scary yet plausible.

The first few chapters of his latest book, "21 Lessons for the 21st Century", sounded like a much better version of my writings over these couple of years. The main thrust was to be wary of automation and AI, and beware of the few elite who own massive amounts of data. There was a paragraph in which a side by side comparison was funny enough --



For the rest of the book, I didn't quite get the focus, if there was one. It felt like were dozens of individual commentaries on different issues pasted together in one single book. It's still definitely worth reading if only for the scattered nuggets of insights here and there, but it didn't really have the kind of coherence you'd have come to expect in his earlier works.  I suppose that's fair, since the 21 lessons per the title already implies a certain amount of discreteness in the content.

Perhaps the author was trying to be subtle, but there were chapters in which he simply laid out the issues without apparently trying to propose a solution or a preferred perspective. Perhaps those issues are too sensitive these days for anyone to say anything on the subject without offending somebody. I dunno.

醃辣椒

早排買咗本 "The Art of Fermentation" ，心思思自己又試下。本書話任何菜都可以醃製發酵，咁我其實之前都試過醃大白菜，變咗啲類似酸菜嘅嘢出嚟，所以今次就試下啲新嘢，醃辣椒。

我將啲辣椒切粒，加少少鹽、醋、擺咗入容器，用橄欖油封頂，然後基本上放咗幾星期。

最近拎佢出嚟食，又真係別有一番風味。冇鮮辣椒咁霸道，但「椒香」反似更濃，用嚟伴菜，比我想像中更好食。唯一略為美中不足就係啲辣椒粒太大，如果切碎少少可能仲好。

本身啲橄欖油係為防發霉，不過封晒油又驚 botulism，好彩連續食咗幾日腸胃都冇咩唔妥，不過下次可能都係加多少少鹽同醋會安心啲。

Richmond 夜市

上星期五，陪香港同事去 Richmond 夜市一遊。

嗰晚有啲雨，有部份舖頭唔開門，不過門外仍然有差唔多一百個人排隊等買飛入場。

好在某位溫哥華同事送咗我哋一張入場券，所以我哋就從快線輕輕鬆鬆入咗去。

我哋未食晏，一入到去就搵嘢食。見到幾檔炸魷魚、串燒，隨便搵咗檔有人排隊嘅買咗盒魷魚嚟食。 味道一般，盛惠 CAN$14，真係多謝晒。（喂俾咗入場費之後仲要捱貴嘢？？）

意猶未盡，再去搵下食。由於有一盒炸魷魚落肚解決咗燃眉之急，開始比較揀擇搵下有冇啲有趣或抵食嘅嘢。結果⋯⋯ 冇。最後為咗填肚，叫咗個盛惠 CAN$3.75 嘅薯仔波。老老實實真係唔多好食。

支付寶

好多食肆都貼住呢啲支付寶嘅廣告。用支付寶可以一蚊食小食，仲要係一蚊人民幣，真係感謝國家感謝黨，望住嗰啲比出面仲貴又唔特別好食嘅嘢，我幾乎就想陪同我國十三億人民就地開返個支付寶帳戶。不過⋯⋯ 都係不了。

查返維基百科，原來 Richmond 係北美州(比例上)最多華人居住嘅城市。難怪大部份舖頭都係由華人(或華人樣貌嘅人)開嘅。望住「新疆佬」咁樣嘅招牌，大佬呀，就算係同鄉我都唔敢幫襯你啦，係咪咁話。而全晚令我印像最深刻嘅係咩呢？

⋯ 係龍鬚糖呀！

唔知香港邊度仲有得食呢⋯？

搵完食，就去睇下其他嘢。

嗰度有啲識得郁嘅恐龍，或者算係栩栩如生，不過黑暗中睇唔得清楚。有啲呃人嘅遊戲攤檔，即係好似擲銀仔咁，但係要擲圈圈，仲難贏過擲銀仔。小弟冇練過暗器，準繩度應該同 random 一樣，不了。剩低嘅大部份都係啲 accessories，手機套、線、飾物、衫、皮帶、電子產品之類⋯⋯

感覺上就係山長水遠去咗女人街，仲要少嘢賣過女人街，仲要頹過女人街。雖則話有部份舖頭唔開門，令嗰晚嘅夜市失色不少，但就算佢哋開咗，都唔見得會令件事有性質上嘅改變。我哋就話好彩，有同事贈送入場券啫，但出面嗰啲排成粒鐘長龍等買飛入場嘅人，究竟諗緊乜呢？ 我真係唔明 :(

去完 Richmond 夜市，心諗完來香港本身都真係唔算差... 所謂身在異鄉每逢佳節倍思親，而家直頭想即刻走去女人街掃貨呀。

最後 show 多張圖，感謝國家感謝黨，去到異鄉作客都感受到國家嘅關懷，我真係無以為報，唯有(最遲)來生再開支付寶嘅帳戶喇。

順帶一提，呢啲舖頭係唔收卡架。Cash or Alipay，yeah!