炒紅米飯

原來就咁炒紅米飯都唔錯。

紅米、藜麥，用電飯煲(慢)煮。我自己會落少少鹽，但可能落唔落都唔係好大分別。煮好攤凍之後，落鑊用油炒。中火 ok。油落多少少都唔怕。撈啲醬入去。我用柱侯醬，但我估南乳都得。再唔係落豉油都 ok。

炒好就食得。又或者可以加啲切絲耶菜或切片芥蘭。


啲紅米唔炒返幾下，會有陣「膠膠哋」或者係好似生麵粉嘅味。炒完就幾香。

[ so99ry 冇圖。 ]

用沙紙磨刀

呢排練習緊磨刀。

幾年前買落幾把 DMT 嘅磨刀工具，呢排幾乎隔日就拎出嚟練下手勢，順便喺網上睇下教學資源咁。

DMT 嗰幾種磨刀工具係好用，但最後成品唔係好利，總係差少少咁。聽聞 DMT 啲 grit rating 唔太可信，偏向粗糙，所以咁嘅結果可能都係正常。但由於磨刀石比較貴，又唔知邊度買好，又唔知邊隻先好，所以冇咩點郁手買。

偶然喺網上見到個好神奇嘅講法，原來沙紙可以用嚟代替磨刀石，仲要唔止一個人咁講。又咁啱我幾個月前買咗一 pack 沙紙，由極粗至極幼都有。咁粗糙嘅沙紙我就唔需要喇，因為已 DMT 嘅已經夠用，但刀鋒唔夠幼細，所以我攞咗最幼嗰隻沙紙，黐咗上去一塊形狀幾次磨刀板嘅嘢度，就變成呢個高科技低能幼細磨刀石喇。

部 iPhone 仲 boot 得起，但成日壞機，加上個鏡頭又碎咗，其實咁樣都算係物盡其用吖。

本身都唔知係咪 work，但真係咪講笑，我啲刀用呢塊 3000 grit sandpaper 磨完之後，真係明顯利咗⋯ (利申：仲未算好利)

瑞士軍刀 邊隻最好？

「瑞士軍刀」大家肯定聽過。可能你屋企有一兩把𠻹。瑞士軍刀有過百款，究竟邊款最好用？

每一款瑞士軍刀都有佢嘅獨特用途，例如用嚟露營啦、野外求生啦、打獵啦、釣魚啦⋯⋯ 不過香港大部份人都係手無縛雞之力嘅辦公室打工仔，啱用嘅瑞士軍刀嘅範圍就細咗好多。

咁當然，你絕對可以買一把幾乎乜都有齊晒嘅瑞士軍刀，例如 Victorinox 嘅 "SwissChamp" 就有 33 種唔同嘅功能。不過，咁多功能即係把刀會好大好厚，用起上嚟唔方便，你更加唔會隨身帶住佢。一把收埋喺櫃筒嘅瑞士軍刀，就算幾多功能，如果你唔用佢都係冇用嘅。

所以一把好用嘅瑞士軍刀，除咗要集多功能於一身之外，仲要啲功能適合你，唔好太多用唔著嘅嘢，最好輕便可以隨身攜帶。

我自己呢幾年，隨身帶住呢把叫 "Manager" 嘅迷你瑞士軍刀。呢把迷你瑞士軍刀嘅好處係，一來輕便，同鎖匙差唔多大細；二來所有功能都非常有用。鉛子筆、鉸剪、刀仔、縲絲批、開瓶器(啤酒樽嗰種)、鉗仔，全部都係對我呢啲手無縛雞之力嘅辦公室打工仔好有用嘅嘢嚟。我最常用嘅係筆，獨撚唔想問人借筆嘅話，最好就係永遠隨身帶住一支。

"Manager"

呢把迷你刀仔嘅壞處就係佢太細。有時想要把大啲嘅工具又點算呢？我有幾個心水，Climber 係一把中型嘅瑞士軍刀，重點係有鉸剪同埋紅酒開瓶器。我覺得帶去旅行最好用。有時懶係中產去旅行想飲返支紅酒，冇帶開瓶器，又係獨撚唔想問酒店/房東借，呢把嘢就好用嘞。

"Climber" (螢光黃色)

如果仲係嫌把刀唔夠大，可以考慮 Trekker 系列。呢系列嘅刀開咗出嚟會鎖實，可以用嚟做粗重工作又唔怕把刀啪返埋斬到自己手指。我自己試過用刀鋒對面嘅「一字縲絲批」(又係鎖得實)去開生蠔，原來都唔錯，唔使特登買把開蠔刀。不過呢把刀唔好隨便周圍拎，否則有可能觸犯「在公眾地方管有攻擊性武器」嘅罪行。始終呢把刀幾大，刀鋒又鎖得實，用嚟傷人真係幾有效。本身佢嘅設計係戶外型嘅，但其實我覺得冇鋸齒嗰款用嚟做廚房刀都唔錯。

"One-hand Trekker", 上面係我把迷你刀仔 "manager", 留意大小差距

如果想要把萬用刀擺屋企用作「一般其他用途」，我覺得最好使嘅唔係瑞士軍刀，而係 Leatherman 嘅 Juice S2。Juice S2 最特出嘅功能係個鉗，而瑞士軍刀通常都冇鉗嘅，就算有都係細細個，唔可以用嚟做粗重嘢。除咗鉗之外，Juice S2 仲有一大堆功能，例如鉸剪、刀仔、縲絲批⋯ 總之都係嗰味嘢啦。佢最好就係有鉗之餘，大小適中，攜帶尚算方便，用起嚟又就手。如果屋企淨係得一個工具，我一定會揀佢。

舊版 Juice S2, so99ry 影得好樣衰

Leatherman 仲有好多其他類型工具刀，不過其他型號對一般手無縛雞之力嘅香港辦公室打工仔嚟講冇乜用（起碼我自己冇買到先⋯），所以暫時唔介紹住喇。

英殖香港不銹鋼

早排睇開刀，無意發現到原來 eBay 好多「古董」香港刀仔。

呢把刀另一邊寫住 "Ka-bar Cleveland, Ohio"，應該係美帝製造。但係 "Stainless British Hong Kong" 即係不銹鋼喺香港造嘅。"British Hong Kong" 嘅不銹鋼，喺呢個年代真係幾型棍。 唔係話咩戀殖，純粹係絕版，此景不再。你收藏清朝古董都唔係留戀帝制吖係咪。

咪睇張相好似咁大把刀，其實迷你刀仔嚟，摺埋細過我尾指。我估用嚟開信封應該幾合適，不過最近好似冇咩點收到信⋯

煎豆腐

最後都係去咗 City Super 買豆腐。（早幾日）

今日攞咗嚟煎。嗱，咁先至叫豆腐架嘛。

呢隻係「絹」豆腐，已經唔係話硬架喇，都硬過啲百福「硬」豆腐花⋯

齋戒

頭先落樓下間超市，買咗盒《百福硬豆腐》返屋企煎。切到一片片拎去煎咗十分八分鐘，最後啲豆腐俾我反兩反，就碎到好似豆腐花咁，又軟又滑。

當然我煎豆腐嘅能力絕對好一般，但都未至於可以神呼其技咁將豆腐變軟啩。雖然中美貿易戰之下黃豆價格上升，但都冇貴到連啲硬少少嘅豆腐都整唔到啩。明明豆腐喺華人飲食文化之中舉足輕重，點解香港啲超市冇啲比較似樣嘅豆腐，真係諗極都唔明。走去 SOGO 或 CitySuper 呢啲地方，啲豆腐就似樣喇，真係要幾硬有幾硬，最緊要係有豆腐嘅質感，唔係豆腐花嘅質感。CitySuper 唔係話嫌貴，不過遠吖嘛，為咗想食幾舊豆腐要行落中環來回大半個鐘，對我呢啲懶人絕對係一重極大嘅心理障。

又話時話點解無端端食豆腐？因為冇肉食呀。呢排好多朋友判監，冇咩心情食好西，就同自己講，雖然咩都做唔到，起碼都戒食幾個星期肉，去警惕自己，唔好忘記人哋嘅付出同犧牲。

屌，我講緊飲食習慣，先冇講政治呀。

又話時話，平時博主食肉食咁多，食素會唔會好唔慣？ 梗係唔會啦，唔食嘢都係唔食肉嘅一種方法。不過絕食幾十日呢啲嘢真係唔易做，都係得閒食下豆腐好啲。

利申：除咗食豆腐，仲有食花生。

好筍嘅旬刀

平時我對刀都冇咩特別要求，但早排整蘿蔔糕，切切下啲食材發現把刀真係鈍到一個點。切啲膶腸切到爛晒，臘肉硬啲啲就切唔入，灰機之餘發現把菜刀原來唔係「切」落啲食材度，而係鈍到變咗「ngat1」落去。

躁躁地之下，就上網研究刀鋒呀鋼呀嘅嘢，連摺刀萬用刀用到嘅鋼都睇埋。（而家對冶鋼嘅嘢相對算係幾熟書，作為 layman 嚟講。）

尋晚睇定咗一把菜刀，「旬」出嘅華式菜刀。呢把刀係我喺網上搵到唯一一把用 VG-10 整嘅華式菜刀。 (佢有時話係 VG-MAX，是但啦。) VG-10 係咩嚟？ 日本製高端不銹鋼，硬度高，刀鋒利，防銹強。質料嚟講，應該算係一般大眾可以買到嘅廚鋼最高級架喇。

近排又學緊磨刀，一磨就明白唔同嘅鋼水整出嚟嘅刀好唔同。瑞士軍刀嘅刀最好磨，由我呢啲生手磨幾分鐘都已經幾利，不過網上評論一致認為瑞士軍刀隻鋼好快鈍。不過易磨就好，起碼磨兩下就可以用。相反，屋企有幾把 cheap 刀，磨極都唔利，唔知係咪我嘅問題 .... 另外，屋企仲有一把高端摺刀 (Benchmade 940)，但係我仲未識磨到佢好利。理論上把 940 嘅 S30V 不銹鋼係可以磨到佢吹毛斷髮嘅，不過我磨咗佢兩三次都差唔多款，唔敢再亂嚟⋯ 網上評論都係話呢隻鋼好難磨，真係冇錯。

講返把「旬」華式菜刀，尋晚半夜無無聊聊，睇下邊度有得買，咩價位。Amazon 兩百幾美金。平時我成日喺 Amazon 買刀仔，幾十蚊美金，細細把，唔驚出事。但呢把兩百幾美金嘅菜刀，托運嚟香港唔知會唔會有問題⋯ （咁大把，海關一查隨時扣住⋯） 所以一查之下發現 SOGO 有售，放工行過去幾分鐘，心諗正啦，只要兩千港幣樓下一定買。

當時我仲未知有 SOGO 大減價。

到咗今日，食晏嗰陣經過 SOGO 先知道原來 SOGO 一年一度、半年一次大減價。一大班人排隊喺 SOGO 門外圍住幾個圈排隊。(痴線⋯) 我聽聞 SOGO 會開到半夜，特登喺公司 hea 到十點幾，過去碰下運氣。十點九去到，人流同平時(日間)冇咩分別，係多人，但唔算逼（香港標準），起碼唔使排隊。入到去搭𨋢直上廚具嗰層，搵到想要嘅嘢，果然有折，原價千九定千八，折咗千五多啲。順便買多咗把細細哋嘅水果刀，夾埋都係千八蚊唔使，平過上網買，比想像中平咗幾舊水，真好。

(我到而家都唔明晏晝喺街上面排隊嗰班人做緊乜⋯ 係咪排緊啲限量特價貨品？)

順便 show off 下我把唔利嘅 Benchmade 940：