齋戒

頭先落樓下間超市，買咗盒《百福硬豆腐》返屋企煎。切到一片片拎去煎咗十分八分鐘，最後啲豆腐俾我反兩反，就碎到好似豆腐花咁，又軟又滑。

當然我煎豆腐嘅能力絕對好一般，但都未至於可以神呼其技咁將豆腐變軟啩。雖然中美貿易戰之下黃豆價格上升，但都冇貴到連啲硬少少嘅豆腐都整唔到啩。明明豆腐喺華人飲食文化之中舉足輕重，點解香港啲超市冇啲比較似樣嘅豆腐，真係諗極都唔明。走去 SOGO 或 CitySuper 呢啲地方，啲豆腐就似樣喇，真係要幾硬有幾硬，最緊要係有豆腐嘅質感，唔係豆腐花嘅質感。CitySuper 唔係話嫌貴，不過遠吖嘛，為咗想食幾舊豆腐要行落中環來回大半個鐘，對我呢啲懶人絕對係一重極大嘅心理障。

又話時話點解無端端食豆腐？因為冇肉食呀。呢排好多朋友判監，冇咩心情食好西，就同自己講，雖然咩都做唔到，起碼都戒食幾個星期肉，去警惕自己，唔好忘記人哋嘅付出同犧牲。

屌，我講緊飲食習慣，先冇講政治呀。

又話時話，平時博主食肉食咁多，食素會唔會好唔慣？ 梗係唔會啦，唔食嘢都係唔食肉嘅一種方法。不過絕食幾十日呢啲嘢真係唔易做，都係得閒食下豆腐好啲。

利申：除咗食豆腐，仲有食花生。