學院哲學 vs 追尋真理

鍾意攞《你識唔識啊？！》嚟恥笑，主要係因為我少少仆街。

不過仆街背後，都係有一種學院誤人子弟嘅感慨。

哲學呢家嘢，真正需要悟嘅嘢，其實唔多。以我嘅靈感同努力，都係每隔一兩年先有啲似樣少少嘅體會。真正「老師級」嘅人，就算嚟嚟去去嗰幾幅屁，只要真正貫通，都可以渡人無數。重點係，你真係要明，而且要信，並且融入個人生活哲學。而唔係背咗一堆 factoid 砌埋一篇文紙上談兵就完事。

唔知係咪「悟」難以考核，學院教出嚟嘅人似乎都好著重「哲學知識」，似係要將前人嘅著作如數家珍咁背返出嚟先至叫叻。本來大學本科生學嘅嘢都難免走馬看花，始終學海無涯，幾年內嘅課程都只能夠將有關範疇嘅皮毛約略講下。

但我懷疑問題唔止係咁。現代學院工業化之後整個生態養出畏首畏尾嘅人，耍小聰明有餘，大智大慧不足。好多問題本身係一點即透嘅，喺官僚制度之下變成要辯論甚至要提倡新觀點嘅人取得辯論資格。

講到尾都係學院嘅象牙塔封閉文化嘅延申。西方學術唔知係因為由神學演化而成所以形成咗學者「唔錯得」嘅傳統，大家為咗維持風光嘅表面背棄對真理嘅追尋轉而走去為份糧而官僚，其實都幾悲哀。

近年社會經歷多咗開始明白「打爛人飯碗」係幾罪大惡極嘅嘢，啲人為咗有得繼續供樓有幾無所不用其極。就算你有絕對真理支撐都要向為保飯碗而發狂嘅打工仔低頭。

所以嘛，都只能慨嘆一句：做學術嘅都唯有繼續做學術，但追尋真理嘅就只能夠由無後顧之憂嘅人去做。