參觀蘋果園

舊老細瓜柴到依家已經有七年光景。

仲記得當年小Jobs子病入膏肓嘅時候，佢仲走上 Cupertino City Council 講解新總部嘅計劃。當時我諗，科技嘅嘢日新月異，幾年後我喺邊都未知，到時我仲喺度做先再講啦。

七年時間轉眼即過，舊同事走咗大半，估唔到我仲喺同一間公司做緊同一個 project。

新總部係最近先開放俾一般員工參觀。早兩個月我上司嘗試帶我去睇睇，但門口話按規矩閒雜人等唔俾入，無功而回。轉轉折折咁多年後，我最後仍然以員工身份走入新總部，感覺不免噫唏。

本身我對新總部最深嘅印像，係佢好似宇宙船嘅辦公室大樓，但一行到入去，發現原來都真係不枉「Apple Park」個「Park」字。嗰笪地雖然有一個巨型辦公室大樓，但絕大部份地方都係園林：有果樹，有加州本地嘅嘅草木，有水池，有小山丘。行到入去，感覺好似離開咗「矽谷」，走咗入一個寧靜芳幽嘅公園，遠離鬧市嘅繁囂。古詩有云：向晚意不適，驅車登古原；夕限無限好，只是近黃昏。唔係吹水，有相為證呀。

有時啲嘢真係好難用文字解釋。矽谷心臟之一嘅 Cupertino，雖然人唔算多，但周圍滿佈辦公室，日間車來車往，附近嘅公路更加係燥音不斷，你好難感受到大自然喺身邊。但入到去蘋果園，真係忽然進入咗一個寧靜庭園嘅感覺。環顧四周，真係見唔到附近市區嘅蹤跡，淨係見到草地、樹木、同埋遠處嘅高山。睇嚟設計者刻意用場內嘅人工土丘，將附近市區嘅景物遮掩，營造一種身處大自然嘅錯覺。當然身處大自然係真，但兩百米外就係遊客穿梭嘅 Visitor Center 同埋蘋果商店，假像仍係假像，不過足以亂真。

網上睇相，同親身去到實物面前，真係兩種唔同感覺。縱使附近就係鬧市，但呢一刻呢一處，卻似係世外桃源，前面係一棟潔白無瑕，偉大而嚴肅嘅建築。我本身唔係一個特別鍾意睇建築物嘅人，成世人冇乜俾建築物感動過。但企喺一塵不染嘅 Steve Jobs Theatre 外面，忽然覺得，整個建築物外部，就好似一個 "shrine" 、一個「神殿」噉樣，紀念住某一個時代嘅某一個大人物。

走入去辦公大圈圈嘅裡面，大概即係俗語所云嘅「核心嘅內圍」。嗰度有一列一列嘅蘋果樹。話說「矽谷」本身係種果樹嘅，不過我今日先知原來蘋果公司有種蘋果。整個蘋果園嘅草木，都好有加州本土特色。喺我呢啲東亞人眼中，加州本土草木，望落去真係好似沙漠嘅植物，真係唔算靚。不過呢啲設計有地理嘅限制，加州本身乾旱，如果要養啲比較「濕」嘅植物就要浪費好多水，所以都真係冇乜計。

喺內圍兜咗轉，望過啲飯堂，喺水池邊坐咗一陣，喺外圍兜返出嚟。咁樣行下又停下，已經大半個鐘。加州嘅人揸車多，好多人步行不足，喺一呢個大飛船嘅辦公室度做嘢就真係冇呢種煩惱。淨係行去飯堂都要好幾分鐘。我見到好多人踩單車，我諗係用嚟喺公司內代步，而唔係用嚟由屋企往返公司嘅。入夜之後，公司室內嘅白光更顯得耀麗，如果我認真走去睇辦公室內嘅白板寫咗啲咩，去睇啲人嘅 mon 顯示啲乜，應該真係會睇到。唔知喺咁多透明玻璃嘅辦公室工作會係咩感覺嘅呢？我應該唔會知道。

行完一轉出返嚟已經日落。夕陽無限好，只是近黃昏，真係唔係講笑呀。

21 Lessons for the 21st Century

I'm sort of a fan of this author. His first book "Sapiens: A Brief History of Humankind" had a couple of insightful interpretations of human history. His second book, "Homo Deus: A Brief History of Tomorrow" was a wild exercise of speculating the future of humanity, which sounded scary yet plausible.

The first few chapters of his latest book, "21 Lessons for the 21st Century", sounded like a much better version of my writings over these couple of years. The main thrust was to be wary of automation and AI, and beware of the few elite who own massive amounts of data. There was a paragraph in which a side by side comparison was funny enough --



For the rest of the book, I didn't quite get the focus, if there was one. It felt like were dozens of individual commentaries on different issues pasted together in one single book. It's still definitely worth reading if only for the scattered nuggets of insights here and there, but it didn't really have the kind of coherence you'd have come to expect in his earlier works.  I suppose that's fair, since the 21 lessons per the title already implies a certain amount of discreteness in the content.

Perhaps the author was trying to be subtle, but there were chapters in which he simply laid out the issues without apparently trying to propose a solution or a preferred perspective. Perhaps those issues are too sensitive these days for anyone to say anything on the subject without offending somebody. I dunno.

醃辣椒

早排買咗本 "The Art of Fermentation" ，心思思自己又試下。本書話任何菜都可以醃製發酵，咁我其實之前都試過醃大白菜，變咗啲類似酸菜嘅嘢出嚟，所以今次就試下啲新嘢，醃辣椒。

我將啲辣椒切粒，加少少鹽、醋、擺咗入容器，用橄欖油封頂，然後基本上放咗幾星期。

最近拎佢出嚟食，又真係別有一番風味。冇鮮辣椒咁霸道，但「椒香」反似更濃，用嚟伴菜，比我想像中更好食。唯一略為美中不足就係啲辣椒粒太大，如果切碎少少可能仲好。

本身啲橄欖油係為防發霉，不過封晒油又驚 botulism，好彩連續食咗幾日腸胃都冇咩唔妥，不過下次可能都係加多少少鹽同醋會安心啲。

Richmond 夜市

上星期五，陪香港同事去 Richmond 夜市一遊。

嗰晚有啲雨，有部份舖頭唔開門，不過門外仍然有差唔多一百個人排隊等買飛入場。

好在某位溫哥華同事送咗我哋一張入場券，所以我哋就從快線輕輕鬆鬆入咗去。

我哋未食晏，一入到去就搵嘢食。見到幾檔炸魷魚、串燒，隨便搵咗檔有人排隊嘅買咗盒魷魚嚟食。 味道一般，盛惠 CAN$14，真係多謝晒。（喂俾咗入場費之後仲要捱貴嘢？？）

意猶未盡，再去搵下食。由於有一盒炸魷魚落肚解決咗燃眉之急，開始比較揀擇搵下有冇啲有趣或抵食嘅嘢。結果⋯⋯ 冇。最後為咗填肚，叫咗個盛惠 CAN$3.75 嘅薯仔波。老老實實真係唔多好食。

支付寶

好多食肆都貼住呢啲支付寶嘅廣告。用支付寶可以一蚊食小食，仲要係一蚊人民幣，真係感謝國家感謝黨，望住嗰啲比出面仲貴又唔特別好食嘅嘢，我幾乎就想陪同我國十三億人民就地開返個支付寶帳戶。不過⋯⋯ 都係不了。

查返維基百科，原來 Richmond 係北美州(比例上)最多華人居住嘅城市。難怪大部份舖頭都係由華人(或華人樣貌嘅人)開嘅。望住「新疆佬」咁樣嘅招牌，大佬呀，就算係同鄉我都唔敢幫襯你啦，係咪咁話。而全晚令我印像最深刻嘅係咩呢？

⋯ 係龍鬚糖呀！

唔知香港邊度仲有得食呢⋯？

搵完食，就去睇下其他嘢。

嗰度有啲識得郁嘅恐龍，或者算係栩栩如生，不過黑暗中睇唔得清楚。有啲呃人嘅遊戲攤檔，即係好似擲銀仔咁，但係要擲圈圈，仲難贏過擲銀仔。小弟冇練過暗器，準繩度應該同 random 一樣，不了。剩低嘅大部份都係啲 accessories，手機套、線、飾物、衫、皮帶、電子產品之類⋯⋯

感覺上就係山長水遠去咗女人街，仲要少嘢賣過女人街，仲要頹過女人街。雖則話有部份舖頭唔開門，令嗰晚嘅夜市失色不少，但就算佢哋開咗，都唔見得會令件事有性質上嘅改變。我哋就話好彩，有同事贈送入場券啫，但出面嗰啲排成粒鐘長龍等買飛入場嘅人，究竟諗緊乜呢？ 我真係唔明 :(

去完 Richmond 夜市，心諗完來香港本身都真係唔算差... 所謂身在異鄉每逢佳節倍思親，而家直頭想即刻走去女人街掃貨呀。

最後 show 多張圖，感謝國家感謝黨，去到異鄉作客都感受到國家嘅關懷，我真係無以為報，唯有(最遲)來生再開支付寶嘅帳戶喇。

順帶一提，呢啲舖頭係唔收卡架。Cash or Alipay，yeah!

啤酒拉麵食評

是咁的。

話說我上司派咗我去溫哥華開會，所以乖寶寶星期日晚就抵達溫哥華喇。尋日係勞動節放假，所以做咗一日遊客，喺溫哥華周圍行。食晚飯嗰陣，喺臉書見有朋友 share 咗一張好 shocking 嘅圖，號稱 "Beer Ramen" （見圖）。我心諗：究竟係邊處嘅天才發明啲咁嘅劣食呢？我一睇，竟然遠在天邊，近在眼前。叫做喺溫哥華附近，搭半個鐘地鐵就到。

冇人理我 :(

今次出 trip 食咗太多地道「美食」，例如路經加州又食咗正宗嘅加州卷，尋晚食咗加拿大嘅 「國菜」 Poutine （肉汁芝士薯條），所以我絕對唔會錯過「地道」嘅特色食物。有得呃下 like，何樂而不為？

所以我就決定抛低其他同事，自己一個去做勇士闖關。

----

間餐廳喺一個華人 mall 度，都幾旺。我七點幾去到，滿座，等咗幾分鐘先有位。雖然佢賣拉麵，但格局一啲都唔似日本餐廳，反而有幾分香港老家嘅親切感。有幾位客人都係叫咗 "Beer Ramen"，但貌似大部份人都係叫其他「正常」嘢。所以佢平日都係有客人嘅，唔係齋賣 gimmick。

其他「正常」食物。 呢種「中、日、英對照」嘅餐牌，係咪好有親切感呢！

面對住咁多「正常」嘅選項，我當然冇臨陣退縮，堅決叫咗「啤酒拉麵」。

成個餐，加幣 $15.95，連稅連 tips 大約港幣一百多啲

介紹返先。「啤酒拉麵」唔係用啤酒整嘅，得個樣似。啲泡沫據聞係用蛋白整嘅，啲湯就似正常嘅冷麵湯。重點係⋯「似」。冷麵湯一般係豉油味醂昆布之類嘅嘢整出嚟，不過佢啲湯就唔止呢啲味道，好似仲有啲難以形容嘅 off tastes，或者係啲濃厚白色液體嘅味道啦。的確係有啲蛋白味嘅。我對個湯底最大嘅投訴係佢甜得滯，不過可能係個人口味問題。

利申：我對劣食嘅包容程度相當高，食好多更奇怪嘅嘢都可以面不改容，所以我懷疑好多比較嘴刁嘅人會頂唔順啲蛋白怪味。

麵質就好韌，超越咗「彈牙」嘅程度，要大力咬落去。不過啲麵全程浸喺啲湯入面，上菜嘅時候韌少少都可以理解嘅。起碼啲麵唔係「淋㴬㴬」，有咬口，算係咁。

個餐仲有炸雞。啲炸雞係「正常」嘢，味道中上，絕對唔係劣食嚟。

蒸籠伴炸雞

不過問題嚟喇：點解日式餐廳嘅炸雞，係用蒸籠上架呢？ 原來呢隻蒸籠大有來頭，係香港西邊街 12 號嘅《德昌森記》製作架。所以都話啦，呢間餐廳有家鄉嘅親切感。




嗱，為咗證明我真係食晒個餐，有片有真相。

最後，俾咗錢，但唔記得拎返張單，得 iPhone 入面影咗張單嘅相。唔知 claim 唔 claim 到數。不過都係多謝公司多謝老細先。

冇其他嘢我返出去先。

冷月

冷潔嘅皎月，俾濃厚嘅密雲遮住。

十萬尺高空，呢度係佢嘅私人空間。

我哋穿過簾幕，打擾咗佢嘅清修。

佢成晚喺度，唔知諗緊啲乜呢。

Duck Leg Carbonara

話說我發現金鐘太古廣場嘅 Great Food Hall 賣緊一種鴨腿罐頭。好大罐，成個生日蛋糕咁大。盛惠兩舊幾水。

網絡圖片

兩舊幾水唔平，但計落其實唔算貴，佢體積其實好大，應該裝得落六七罐午餐肉。入面啲鴨腿算係高質嘅食物(亦都係相對午餐肉而言)，同埋有好多好多鴨油。我通常用個大容器裝住啲鴨油，淨係啲油都值幾十蚊，除笨有精，唔怕食幾日鴨嘅話不妨買嚟試下。

啲鴨肉可以用嚟煮咩呢？其實加熱齋食或者餸飯或麵包都唔錯，不過今日我就試咗用佢嚟整 carbonara。

基本上做法同 carbonara 一樣，只不過唔係用煙肉而係用鴨肉。啲鴨腿肉本質有少少乾，所以煎嗰陣要落少少鴨油。煎完出嚟可以輕易拆成一條條鴨肉絲。

結果變成咁。眼尖嘅你，一定發現啲嘢全部熟過頭。
Well，喺廚房一分心就變成咁。我同時洗緊廚房地下⋯⋯

雖然執行上失敗咗少少（如圖），例如啲意粉煮太耐變咗茶記style，啲蛋又太熱熟透咗，最後有種茶記白汁雞皇意粉嘅感覺，但其實罐頭鴨肉整 carbonara 真係唔錯。稍有智商嘅人應該都會整得好過我今次，而其實今次啲製成品唔算太難食架咋。

東京唔熱喇 #6

上回講到，考慮一大堆路線之後，決定都係經東京市中心，喺上野搭鐵去成田機場。

呢個究竟係咩車牌嚟⋯

下晝三點幾機，我中午仲有時間喺東京市中心附近兜個轉。好在今日落微雨，東京終於唔熱喇，仲有少少涼𠻹。如果唔係落雨，攞住個喼周圍走，你都咪話唔辛苦。

某宅宅同事介紹我去呢間「Cure Maid」女僕 cafe，話佢啲女僕少麻煩，唔特登造作，可以當係普通 cafe。果然，我去到，自己一個安安靜靜嘆完個餐。嗰陣十一點幾，人又少，幾舒適。

Cure Maid 嘅蛋包飯

之後去咗アメヤ横丁嗰度行咗轉。據聞係出名嘅遊客區，但我點睇都似係香港嘅街市＋鴨寮街＋女人街＋西環海味街嘅混合體⋯ 有返咗香港嘅感覺，不過就真係冇乜買野嘅意欲。

離開之前，去咗上野嘅不忍池。八月荷花盛放，好靚。不過趕時間，淨係隨便影咗幾張相，都冇時間慢慢欣賞。

隨便影都好靚。個不忍池好大，荷花成千上萬。

不忍池

之後就去機場lu~。大概由於朝早未夠瞓嘅關係，將啲瑞士軍刀擺咗喺背囊，俾人抄咗牌，仲幾乎冇咗幾把刀 :( 好在勉強夠時間出返去，check in 返啲刀仔。聽聞日本嘅刀管制幾嚴，如果嗰幾把刀大多少少，可能返唔到香港，要俾人扣留幾日都唔定⋯⋯ 好彩平時信奉 Murphy 大神，冇將啲大把嘅刀帶過去日本唧⋯⋯

然後，架飛機搞咗成粒鐘都唔肯起飛，原因不明⋯⋯

唔知玩緊乜

雲呀~

我坐嗰班機停台北先到香港。喺台北上返機嘅時候，無端端俾人 upgrade 咗做 business class⋯

其實我本身個econ位已經係前排，所以變 business 都差唔遠。係啲食物好食少少咁。

台北市(應該係?)夜景

東京好熱 #5

第二朝早，我哋執拾行裝返東京市區。

成功喺郊野生存咗一晚，梗係飲返杯奇怪飲品慶祝下先。

鹽味西瓜汁酒精飲品。比想像中冇咁難飲。

第一個落腳點，係享譽於中國十三億人嘅⋯ 靖國神社。

真係聞名不如見面

我哋喺靖國神社入口附近，見到有人示威，話要求美國就兩粒原子彈道歉。講真，公義呢家嘢嘢⋯⋯。

靖國神社 （利申冇入到去）

最後，我哋因為行程關係，冇入到去靖國神社，不過就喺側邊嘅「遊就館」留咗一陣。與其話「遊就館」係一個軍事博物館，我覺得反而更加似係一個「日本民族建設史」博物館。最近我迷上咗民族構建嘅過程，單係呢一點，我諗我遲啲應該會去多一兩次，慢慢睇。

據聞呢個係原汁原味嘅日本海軍咖哩，同現代日式咖哩都幾唔同

但呢一日，唔留得耐，因為其他團友各自有自己行程。有人要繼續睇靖國神社，有人要還車，有人要去秋葉原，有人要返屋企梳洗，總之下午大家各散東西。我就跟咗團友 R 去秋葉原。

色彩繽粉呀

不過其實我唔算好宅，去到行咗陣，冇咩收穫。最後 end up 重操故業。上次認真玩 DDR 已經係十年前喇。人生⋯⋯

200yen 玩 double 其實幾抵

而家玩 10lvl 嘅紅歌已經好吃力 :(

之後同團友再會合，食飯。晚飯係團友 W 介紹嘅關東煮。

關東煮，五人前。究竟點樣俾五個人分呢？

是日最好味嘅，牛肋(?)串燒。堅好味。隨時係全旅程最好味嘅食物。

豆腐飯。團友 W 話平日好好好味，但今日重口味咗啲。

去到呢度，東京之旅就差唔多結束。聽日晏晝就上機返香港。夜晚去咗團友 S 屋企借宿。嗰處喺東京嘅東面，本身比較近成田機場，但我考慮一大堆路線之後，最後都決定⋯返返東京市區搭高速機場鐵路，好似咁樣反而最快（最安全）到機場⋯⋯

東京好熱 #4

早餐比想像中豐富，連白飯都任添。差啲食唔晒。

我比大隊早咗十幾分鐘到，侍應嬸嬸走埋嚟同我講「遅いね，みな」...

食完早餐就出發去台ヶ原金精軒本店食水信玄餅。嗰度遠離市區，四下都係稻田，竟然都要攞籌排隊先有得食。

下面嗰啲係水嚟，照計應該係水稻

好在隔籬有個酒莊，我順便去咗試酒同買酒。買咗支純米大吟釀，仲未飲。

傳說中嘅水信玄餅

個「水信玄餅」個賣相就真係幾獨特。彈下彈下，有少少似啫哩，但比啫哩實淨之餘又軟少少咁。甜嘅食物，唔識評論。

之後去咗信玄公宝物館。佢個環境幾靚。

啲松樹幾有 feel。究竟係種出嚟，定係本身生得咁靚？

佢側邊個惠林寺一休奄啲食物唔錯。叫咗個ほうとう(菜同烏冬做嘅料理)，唔錯。

ほうとう（右邊嗰碗嘢），個音聽落似「好多」⋯ 呢餐都真係叫多咗⋯

夜晚去露營。所以之後就去咗露營地點。

途中發生一個小插曲，就係我哋嘅司機大人轉錯線行咗倒頭車。不過，有驚無險。（其實我就冇乜點驚，不過後面啲團友們就驚驚豬⋯⋯）

露營地點環境唔錯

「西湖」

入咗夜之後幾有 feel。不過我諗極都唔明，點解去露營會有瓦煲，同埋有急凍餃子食⋯

聽聞去露營都係聖地巡禮一部份，應該係某套動漫入面嘅情節？

香港人露營梗係深夜傾下計咁，但似乎日本人露營係勁早就瞓晒。有位工作人員伯伯每隔十幾分鐘就走過嚟，好有禮貌咁叫我哋快啲瞓唔好嘈。有團友聲稱見到流星，不過得佢一個見到⋯ 本身我哋諗住唔講咁多嘢，一齊望下星星啦，點知去到半夜忽然好大霧，乜都睇唔到。最後大家點幾鐘就瞓晒。伯伯好嘢！

東京好熱 #3

第三日。大清早由飯能市嘅旅館出發去秩父。出發之前喺「珈琲館 (kohikan)」度食咗個早餐，個雞蛋唔知乜包有驚喜。

啲蛋有驚喜，佢加咗醬汁， 好熟悉嘅味道但又諗唔起係咩嚟⋯

秩父市對我嚟講就冇咩特別，不過又係聖地巡遊 地點，其他團友參觀得好興奮。



喺秩父市買咗一堆手信，收穫尚可。另外食咗個 cream puff。都唔錯。

喺秩父市內玩完之後，我哋就揸車向甲府/山梨市方面出發。沿途有山有水，不過車入面好難影得靚。總之風景怡人。

沿路仲有好多長長短短嘅隧道。有啲都幾有 feel。

中午時到咗重點聖地：秩父橋。究竟係邊個動畫嘅聖地呢，我已經冇 考究。淨係知道東京好熱，東京好L熱⋯⋯

聽聞動畫入面嘅女角企喺欄杆上面玩，搞到要整個咁嘅告示出嚟⋯

我哋仲成班團友一齊喺橋下面影相，重演動畫入面嘅 景像，連藍本都有埋⋯

為咗湊人頭，我呢啲唔關事嘅人都俾人捉咗去影相⋯ 嗚⋯

影完相，我哋就搵嘢食。喺網上搵到荒郊之處有間蕎麥麵店。呢間麵店勁喇，個老闆竟然喺香港住咗十幾年！！！ 他鄉遇故知(?!)，梗係比較好傾。不過佢哋都係用日語傾計，我大約聽得明兩成，插唔到嘴。

呢個地方未至於四野無人，但都 已經係鄉郊農村嚟。唔知一日有冇幾個客⋯

老闆話蕎麥麵賣剩四個，所以另外兩位團友就食素麵。

啲蕎麥麵唔錯，不過老老實實，佢啲素麵仲好食。

食完麵，同老闆再吹多陣水，我哋就繼續向甲府/山梨市進發。不過在此之前，老闆介紹我哋順便睇埋附近啲景色。

滝沢ダム

滝沢ダム另一邊

呢個神奇天橋叫做「雷電廿六木橋」

究竟呢個水霸有幾高？

去到山梨市，順便望下個広瀬ダム。

冇影到広瀬ダム個水霸，不過另一邊就幾靚

広瀬ダム山水

我哋繼 續揸車，穿過山梨市、穿過甲府，去到西邊嘅一個溫泉旅館。食咗個豐富嘅晚餐。不過嗰度啲侍應嬸嬸都幾不耐煩⋯ 晚餐早餐都係咁催人趕收工⋯

好食~ 尤其條(多春?)魚唔錯

天色幾靚

好喇，終於講到旅程嘅重點！

我哋喺旅館攞住部 Surface Pro 睇咗舊年上映嘅動畫，叫做《打ち上げ花火、下から見るか？横から見るか？》(港譯：《煙花，應該和誰看》)。哇靠，究竟講乜 X呀個故事⋯⋯ 劇情發展緩慢，每次穿越就被迫睇多一次 龜速嘅情節，然後男女主角私奔嘅時候，喺電車上面⋯⋯ 女主角忽然間唱歌⋯⋯ 我忍唔住爆咗句：「做乜鳩呀⋯⋯」

後來睇返網上評論先知道，原來有人擅自撰改原作，將小學生嘅puppy love故事，變咗做弱智中學生on99。一班中學生爭論「煙花係圓定係扁」真係好難令觀眾投入。同樣嘅事情，喺唔同年紀發生，會完全唔同感覺。然後個奇怪波波又係冇頭冇尾，明明劇情只需要交代男主角自己 FF 就夠，夾硬加入科幻元素，不倫不類，係咪覺得故事越懸疑越解唔通，就越有文藝味道？

唔明點解好多影評攞佢同《君の名は》相比。明明後者嘅故事舖排、角色描繪、科幻元素解釋都做到足，而呢套戲⋯⋯ 係零呀，同任何正常戲相比，都係零呀。爛片唔係因為同人比相形見拙，而係真係爛到出汁呀⋯⋯ 唔知點解仲有人話係令人感動嘅純愛電影，明明係究極膚淺嘅小學雞FF，仲要變咗做中學生，大佬咁搞法就嚟觀音娘娘派軍糧都叫做浪漫架喇。