東京好熱 #2

第二日，接咗第四位團友之後，就出發去和光市。午餐食烏冬。新倉うどん，唔記得咗影相⋯ 總之好食啦。

然後就去咗和光市唔知乜聖地。

冇獎遊戲，究竟呢個公園係邊個動漫嘅聖地嚟？ (利申我唔知)

由於東京真係太熱嘅關係，我都冇深究係咩動畫咩聖地，我只係搵咗個相對陰涼嘅位抹汗⋯⋯

之後去咗川越市。去咗氷川神社。神社呢家嘢我冇乜特別興趣，反正唔係善信，佢又似乎寫住唔好影相，所以我又係搵咗個陰涼位置抹汗⋯⋯ 聽聞呢間神社係求愛情，所以其他團友比較踴躍都唔出奇。嗯。

川越有個鐘，個鐘つき通り好多有趣店舖。（冇影到個鐘，唔識影

醬油味雪糕

仲有個醬油味軟雪糕，醬油味更濃，一試難忘

日式建築嘅 Starbucks

我哋之後去咗福呂屋。佢好似主打賣菓子嘅，不過啲抹茶都好正。我叫咗個豆奶抹茶，好味。

晚飯係小川菊嘅鰻魚飯。

本身我唔算好鰻魚（對啲魚骨有恐懼），不過都真係好食。

另外，條街夜晚係幾靚嘅。

夜晚喺旅館，玩咗幾個紙牌遊戲， 不過由於本人對玩 game 興趣不大，氣氛唔算濃烈，最後我去咗努力睇書 :0)

東京好熱 #1

上回講到八月頭會去日本。終於去咗喇。

今次純粹係有朋友組團自遊行，我呢啲懶人唔想plan行程又唔識日文，就搭單跟機，有朋友諗掂晒行程，我就淨係負責玩同食，咪話唔爽。

凌晨機，朝早降落，我哋應該係成田機場第一班機，個日出幾靚。

去到日本第一餐梗係食麥記啦（大誤

其實係等緊朋友專車接送 (都話搭單旅行最爽架啦)。但東京真係太熱，所以入咗去冷氣地方等。我又唔知日本麥記規矩，白嘆冷氣唔知啱唔啱，「遠慮」咗一陣之後都係決定買返啲嘢食。作為豬柳強 KOL，我本身諗住叫豬柳蛋漢堡，但呢個係期間限定包，最後都係抵受唔住佢嘅誘惑⋯



..... 其實冇咩特別，都係豬柳強啲 friend 嚟。幾年冇嚟日本，我啲日文進步咗少少，嗌餐嗰陣冇咩難度 （係我唔明佢講乜啫），不過店員聽唔明「orange juice」，可能我發音唔正啦。

朋友嚟到，揸車送我去另一朋友屋企擺低行李，然後出發去東京市區。話時話，點解唔係我查車？好簡單，因為我懶，冇攞到國際車牌囉⋯⋯

坐地鐵化妝大家見得多，揸車化妝我都係第一次見

另外無聊影低咗東京鐵路圖，一開始覺得不可思議，但喺東京留咗幾日都唔覺得咁難理解了⋯



行程第一日，有團友未 join，有團友返緊學，所以小貓三隻去咗睇戲。（順帶一提，喺東京第一餐食完麥記之後，第二餐係食戲院垃圾食物 [見圖背景]。yeah~）


第一次喺日本睇戲，喺唔識日文嘅情況下都大致睇明咗個劇情。

戲名叫做「未来のミライ」。唔算爛片啦，畫質 OK，但劇情有少少跳躍。一時講家庭點滴，講湊兩個細路好忙，一時變咗穿越時空，一時變咗男主角跳入魔女結界(小圓嗰隻)，作為男主角成長故事，略欠連貫性，同埋唔知點解片名用男主角個妹個名，明明佢只係大配角嚟⋯

不過輕鬆睇下冇壞嘅，起碼都尚算係一個故事。（唔似得兩日之後睇嗰套爛片⋯）

睇完戲，就同剛放學嘅朋友會合，然後就行行行行行行咗廿幾分鐘去到目的地食好西。嚟咗日本大半日，終於有「日式」嘅嘢食喇。至於沾麵算唔算「中華料理」呢個哲學問題就暫且唔理。

五ノ神製作所

蝦沾麵 (加咗隻蛋)

五ノ神製作所，睇佢個招牌都知招牌料理係蝦同沾麵啦。佢都真係幾旺場，下晝三點幾去到，竟然要排隊。講到呢度又要講多次：東京熱，東京好L熱⋯⋯ 等咗一陣，終於有位，叫咗個蝦沾麵，唔錯。麵質韌勁彈牙，醬汁蝦味鮮濃 （按：冇蝦肉）。唯一「問題」係佢「正常」份量真係好大份，食完飽到 hihi。店員有提醒同行女生可以嗌細份，但冇提醒我囉⋯⋯ （最後同行男友人食剩咗一大半碗麵）

食完麵之後，大伙兒一齊去尋找「腳膠之庭」（新宿御苑）。其實佢喺麵店隔籬。不過要兜個大圈先去到入口，然後發現，新宿御苑四點半收工，最後入場時間係四點正。我哋抵達時係四點零幾分⋯⋯⋯ 同行幾位同行宅宅即刻残念⋯⋯ 話時話，今次組團目的好似話係聖地巡遊，所以今日行程算係大失敗⋯

聽同行朋友講，日本有間連所餐廳叫做「MK Restaurant」，唔知同香港個 MK 有冇關係呢⋯

之後我哋去咗唱 K。好似大部份都係動漫主題曲，我諗我得三四首聽過。其中一首係 Only My Railgun，我哋主席又真係唱到，寫個服字俾佢。我拍咗片，不過唔 upload 上嚟喇，主席怕醜。

之後我哋去咗朋友屋企食晚飯。除咗「正餐」之外，佢飲咗 1 公升牛奶。話時話，呢個都唔算勁，佢早排「失戀」（好似係），一日之內飲咗超過 1 公升烈酒，都好似冇死到。所以諗返轉頭我都真係唔應該大驚小怪⋯⋯

謎之積分優惠

呢兩日無聊起嚟，沉迷研究信用卡優惠。睇完一大輪之後嘅結論都係用返啲免年費「頹」卡比較好，因為以我嘅洗費（包括幫人買蘋果機嘅洗費），換返嚟嘅優惠遠遠唔夠填補年費嗰筆錢。當然，所謂「頹」卡，都係擺幾十萬喺銀行就自動免年費嗰啲，其實頹極都有個譜，不過免得年費自然就冇咩筍優惠，都預咗啦。

不過呢個 post 唔係講信用卡積分，而係講緊一個應該冇咩人聽過嘅會員積分網 "The Club"。我點解會知，係因為 Citibank Prestige 信用卡送 Club Sim 數據漫遊，我就睇下究竟呢個迎新優惠究竟值幾錢。

一睇，又幾有趣喎。由於我嚟緊呢兩個月會去日本、美國、加拿大，所以都想睇下有咩數據漫遊選擇。佢個網冇咩資訊，迫人開咗 account 先，我事但開下啦，發現⋯⋯哇屌，點解有千幾積分嘅？！？

原來我每個月俾錢網上爬，同埋之前用緊嘅 CSL，都唔聲唔聲咁儲緊積分架，屌你。佢攞住我身份證 link up 晒幾間電訊商 (HKT/netvigator/CSL/1010) 嘅資料，又係幾勁喎好似 （以香港水平嚟講）。

真係估佢唔到。反正兩星期後會去日本，梗係用積分換咗張 Sim 咭啦。換領地點喺屋企步行十分鐘內去到，張卡市價 $88 蚊，又唔算貴，下次去台灣日本之類嘅地方仲可以再用，免麻煩。年中俾咗咁多錢上網爬，冇理由唔用盡佢嘅。

仲有冇人想換？我應該仲可以換到兩三張⋯

磨刀

努力練習咗一輪，又買咗一輪磨刀石 (鑽系，唔係水磨系)　，而家啲刀終於可以勉強用嚟剃鬚。

總覺得仲差少少，可能過幾個月之後會好啲。

炒紅米飯

原來就咁炒紅米飯都唔錯。

紅米、藜麥，用電飯煲(慢)煮。我自己會落少少鹽，但可能落唔落都唔係好大分別。煮好攤凍之後，落鑊用油炒。中火 ok。油落多少少都唔怕。撈啲醬入去。我用柱侯醬，但我估南乳都得。再唔係落豉油都 ok。

炒好就食得。又或者可以加啲切絲耶菜或切片芥蘭。


啲紅米唔炒返幾下，會有陣「膠膠哋」或者係好似生麵粉嘅味。炒完就幾香。

[ so99ry 冇圖。 ]

用沙紙磨刀

呢排練習緊磨刀。

幾年前買落幾把 DMT 嘅磨刀工具，呢排幾乎隔日就拎出嚟練下手勢，順便喺網上睇下教學資源咁。

DMT 嗰幾種磨刀工具係好用，但最後成品唔係好利，總係差少少咁。聽聞 DMT 啲 grit rating 唔太可信，偏向粗糙，所以咁嘅結果可能都係正常。但由於磨刀石比較貴，又唔知邊度買好，又唔知邊隻先好，所以冇咩點郁手買。

偶然喺網上見到個好神奇嘅講法，原來沙紙可以用嚟代替磨刀石，仲要唔止一個人咁講。又咁啱我幾個月前買咗一 pack 沙紙，由極粗至極幼都有。咁粗糙嘅沙紙我就唔需要喇，因為已 DMT 嘅已經夠用，但刀鋒唔夠幼細，所以我攞咗最幼嗰隻沙紙，黐咗上去一塊形狀幾次磨刀板嘅嘢度，就變成呢個高科技低能幼細磨刀石喇。

部 iPhone 仲 boot 得起，但成日壞機，加上個鏡頭又碎咗，其實咁樣都算係物盡其用吖。

本身都唔知係咪 work，但真係咪講笑，我啲刀用呢塊 3000 grit sandpaper 磨完之後，真係明顯利咗⋯ (利申：仲未算好利)

瑞士軍刀 邊隻最好？

「瑞士軍刀」大家肯定聽過。可能你屋企有一兩把𠻹。瑞士軍刀有過百款，究竟邊款最好用？

每一款瑞士軍刀都有佢嘅獨特用途，例如用嚟露營啦、野外求生啦、打獵啦、釣魚啦⋯⋯ 不過香港大部份人都係手無縛雞之力嘅辦公室打工仔，啱用嘅瑞士軍刀嘅範圍就細咗好多。

咁當然，你絕對可以買一把幾乎乜都有齊晒嘅瑞士軍刀，例如 Victorinox 嘅 "SwissChamp" 就有 33 種唔同嘅功能。不過，咁多功能即係把刀會好大好厚，用起上嚟唔方便，你更加唔會隨身帶住佢。一把收埋喺櫃筒嘅瑞士軍刀，就算幾多功能，如果你唔用佢都係冇用嘅。

所以一把好用嘅瑞士軍刀，除咗要集多功能於一身之外，仲要啲功能適合你，唔好太多用唔著嘅嘢，最好輕便可以隨身攜帶。

我自己呢幾年，隨身帶住呢把叫 "Manager" 嘅迷你瑞士軍刀。呢把迷你瑞士軍刀嘅好處係，一來輕便，同鎖匙差唔多大細；二來所有功能都非常有用。鉛子筆、鉸剪、刀仔、縲絲批、開瓶器(啤酒樽嗰種)、鉗仔，全部都係對我呢啲手無縛雞之力嘅辦公室打工仔好有用嘅嘢嚟。我最常用嘅係筆，獨撚唔想問人借筆嘅話，最好就係永遠隨身帶住一支。

"Manager"

呢把迷你刀仔嘅壞處就係佢太細。有時想要把大啲嘅工具又點算呢？我有幾個心水，Climber 係一把中型嘅瑞士軍刀，重點係有鉸剪同埋紅酒開瓶器。我覺得帶去旅行最好用。有時懶係中產去旅行想飲返支紅酒，冇帶開瓶器，又係獨撚唔想問酒店/房東借，呢把嘢就好用嘞。

"Climber" (螢光黃色)

如果仲係嫌把刀唔夠大，可以考慮 Trekker 系列。呢系列嘅刀開咗出嚟會鎖實，可以用嚟做粗重工作又唔怕把刀啪返埋斬到自己手指。我自己試過用刀鋒對面嘅「一字縲絲批」(又係鎖得實)去開生蠔，原來都唔錯，唔使特登買把開蠔刀。不過呢把刀唔好隨便周圍拎，否則有可能觸犯「在公眾地方管有攻擊性武器」嘅罪行。始終呢把刀幾大，刀鋒又鎖得實，用嚟傷人真係幾有效。本身佢嘅設計係戶外型嘅，但其實我覺得冇鋸齒嗰款用嚟做廚房刀都唔錯。

"One-hand Trekker", 上面係我把迷你刀仔 "manager", 留意大小差距

如果想要把萬用刀擺屋企用作「一般其他用途」，我覺得最好使嘅唔係瑞士軍刀，而係 Leatherman 嘅 Juice S2。Juice S2 最特出嘅功能係個鉗，而瑞士軍刀通常都冇鉗嘅，就算有都係細細個，唔可以用嚟做粗重嘢。除咗鉗之外，Juice S2 仲有一大堆功能，例如鉸剪、刀仔、縲絲批⋯ 總之都係嗰味嘢啦。佢最好就係有鉗之餘，大小適中，攜帶尚算方便，用起嚟又就手。如果屋企淨係得一個工具，我一定會揀佢。

舊版 Juice S2, so99ry 影得好樣衰

Leatherman 仲有好多其他類型工具刀，不過其他型號對一般手無縛雞之力嘅香港辦公室打工仔嚟講冇乜用（起碼我自己冇買到先⋯），所以暫時唔介紹住喇。