(backup先，費事觸碰敏感詞被del...)
唔知係咪俾啲woke嘢搞到心有餘悸，而家見到人哋用「奴性」兩個字都特別在意。好哋哋話人有「奴性」其實唔係咁好嘅，不過我會示範點樣做一次。
我哋睇返現代人點用「奴性」呢個詞。基本上係用嚟批評啲人「樂於做奴隸」嘅。例如可以用嚟形容啲「明明人工低，但好鍾意返工，一日做十幾個鐘，免費同老細開 OT嘅人」；又或者「收到少少好處就幫啲權貴仆心仆命，然後被condom抛棄嘅人」 總之待遇唔好，但仍然好樂意盡力做好工作甚至做突嘅人，就可以話係有「奴性」。
但奴隸真係咁樣㗎咩？
唔知大家見過真正嘅奴隸未，聽聞最 stereotypical 嘅奴隸係被人剝奪自由、強制勞動，所以想當然佢哋唔會好熱愛工作，大概好抗拒主人，甚至仇恨一切有錢人同資本家階級。Stereotypical 嘅奴隸心理係最好唔使做，但由於人生未經歷過自由，唔識得人生要目標，總之最迫切嘅願望就係冇人迫佢做嘢，懶懶閒都可以生存。 (利申唔係奴隸史專家或奴隸心理學家，有錯歡迎指正)
所以我見到嘅情況係，社會上一班心態上最似 stereotypical 奴隸嘅人 (抗拒做嘢、仇視權貴階級)，大大聲指責啲唔介意待遇差都樂於工作嘅人有「奴性」。
我以前有句戲謔嘅說話叫「自由意志就係開心食屎」：鍾意食好嘢係人之常情，可以話係動物本能，講唔上係人類獨有嘅自由意志；所以真正能夠體驗自由意志就係食屎。呢個係要克服本能反應先做得到嘅嘢，可謂人類意志嘅癲峰，冇返咁上下 will power 都做唔成。
雖然「冇錢收幫權貴做走狗」、「最低工資同老細開 OT」呢類行為未必有食屎咁難受，但始終唔係十分舒服嘅嘢嚟，所以我會覺得做到呢類嘢，都係需要某程度嘅自由意志㗎。講得自由意志，又何來「奴性」呢？
所以一班用 stereotypical 奴隸思維思考嘅人大大聲批判其他人有「奴性」呢個現像係超級搞笑，根本係將件事反轉咗咁講。 如果要 prescriptive 啲咁用個詞語，我嚴重懷疑啲將「奴性」掛喺嘴邊嘅人，都係有「真．奴性」。
大家不妨留意下係咪咁。
-----------
好，講多兩句認真嘢。
-----------
喺「真．奴性」嘅人眼中，世界真理就只有「用最小嘅付出獲得最大嘅個人利益」。 所以佢哋見到人嘅付出同收獲不成正比都願意做嗰陣，就會忍唔住出言攻擊 （因為「做壞個市」嘛）。話人 on9、話人「奴性」，總之最醒目就係做自私撚。
但呢個世界其實唔係咁，亦唔可以係咁。如果世界冇人肯接受低收入嘅各類厭惡性工作（洗碗、洗廁所、etc..），會搞唔掂。咁當然呢個狀況都同資本主義社會某程度上用飢寒去迫啲低技術嘅人做呢啲工，而資本主義係需要批評嘅（我做咗唔少，應該可以攞豁免），但如果有人做呢啲工做得開心，總唔應該話佢哋「奴性」重啩？ 「真．奴性」思維嘅問題主要唔在於對階級制度嘅批評，而在於「唔俾人開心」。攞最低工資而開心唔得咩？做權貴走狗而開心唔得咩？
最屈機嘅係，「真．奴性」唔係真心否定「利他」精神，純粹係睇唔起啲人將自己賣得咁「cheap」。某程度上有錢人先至係最 on9：巴菲特九十幾歲仲努力工作，李嘉誠都係做到九十先開始退休。「咁努力搏乜？又冇得升職。」啲超級富豪賺多幾百億都係數字遊戲嚟，死咗帶唔走，點解一隻腳踏入棺材，都仲咁「 on9 」咁鍾意返工？ 喺富豪榜上有排名都仲要辛勞，仲唔係「奴性」超標？但從來冇人會咁樣話佢哋。甚至我懷疑最鍾意將「奴性」啩嘴邊嘅人，心裡面係超級崇拜李嘉誠巴菲特呢啲。（【個人感受】呢啲係貨真價實嘅「開心食屎」，如果我有幾十億應該唔會再日日諗賺錢嘅問題⋯ )
所以大家可以見到，講「奴性」嘅人，唔係抗拒社會唔公平嘅結構，純粹係搵個自己熟悉嘅詞語去 gaslight 其他人。我自己覺得，有奉獻心係偉大嘅，無論係on9食屎定係無償為世界作出貢獻，都唔應該俾人用混亂嘅邏輯冠以「奴性」嘅標籤。
