香港粵語考源

有人話廣東話保留咗好多古漢語嘅特質。好多字詞都係源於古代漢語，喺當今官話已經失傳。我哋不如就考究下香港流行廣東話嘅詞彙，睇下佢有幾古。

「巴士」

「巴士」本字「巴駟」。「巴」係地方名，大概係今日四川一帶，秦漢時同蜀地並稱「巴蜀」。地勢崎嶇，多為山路，迂迴曲折。康熙字典引【三巴記】：「閬苑白水東南流，曲折三迴如巴字」。所以「巴」字係描述「巴士」路線為咗接載更多乘客而成日大兜路；至於「駟」就係「四匹馬」嘅意思，借代馬車。普通馬只可以載一兩人，但馬車可以載好多人，所以載客嘅交通工具都叫「駟」 (見「的士」條)。咁啱得咁巧，一架巴士喺馬路上大約係四架房車咁大。

「的士」

「的士」本字「的駟」。「的」字，係「目的」咁解。相比起「巴士」嘅迂迴路線，「的士」係直接到達「目的地」，所以為名。「士」本字「駟」，解「四匹馬」，借代馬車。普通馬只可以載一兩人，但馬車可以載好多人，所以載客嘅交通工具都叫「駟」 (另見「巴士」條)。

「搣時」

「搣時」本字「妹士」，用嚟稱呼年輕貴族女性。「妹」當然指年輕女性，而「士」就係對貴族嘅尊稱。呢個稱謂由廣洲傳到歐洲，英語用「Miss」、「Mistress」之類嘅稱謂都係由歐洲人喺廣州經商傳過去嘅。

「波士」

「波士」本字「保士」，指上司、老闆。「保」字有「負責」、「管教」嘅意思。古代「士」可以係大戶嘅門客，今日稱為「員工」。所以「保士」就係負管理員工。

「奴才」

根據友人考證，「奴才」本字係英文「no choice」。

[得閒會再加]

「耐人尋味」

呢幾張圖係《粵典 words.hk》嘅 analytics 數據。

唔知算唔算「商業機密」，如果呢啲數字係某種「財產」，以我身份亦都冇權隨便將佢免費發佈。

不過，淨係得我知又周身唔自在，總係想同人分享。所以擺住喺度先。我只能夠講句：耐人尋味。

 

孟晚舟唔再慢慢周

得罪主權國周身蟻，無論邊個國家都係咁話。小國發窮惡直接搶，例如白俄羅斯喺領土上空「劫機」；未完成發展嘅大國，有時會喺鄰國「偷渡」犯人返國；但真正嘅世界強國，手段就真係與眾不同。大國講文明、法治架嘛，點會咁失禮呢？作個罪名叫盟友做白手套幫佢「引渡」啲欽犯，寫封信就得，啲 dirty work 唔使自己做。

美國以司法制度企圖「綁架」外國人都唔係新鮮事。比較廣為人知嘅係 Wikileaks 嘅 Julian Assange，澳洲人，佢喺英國俾人控告，一開始係話佢喺瑞典性侵要引渡，匿咗喺厄瓜多爾大使館，變相自我軟禁七年。去到 2019 年，厄瓜多爾大使館放倫敦警察入去拉人，然後美國終於出手話要引渡佢去美國受審。過咗咁多年，大家都唔記得 Wikileaks 係咩嚟，不過美國人冇忘記邊個爆料令佢哋 lose face。總統換咗三任，不過美國人個個都咁愛國，「國恥」係唔會隨著年月而忘記嘅。

另一位冇咁出名，又係同美國冇直接關係嘅「受害者」，係一位自稱 Kim Dotcom 嘅德國人。佢 ~2003 年喺香港 (係呀香港！) 開咗間科網公司，叫做「MegaUpload」，相信有返咁上下網齡嘅朋友都有啲印像。佢 2010 年投資移民去咗紐西蘭。2012 年，美國政府話佢侵犯版權，要紐西蘭政府越洋過海引渡佢去美國受審。而家 2021 年佢喺邊？據報仲喺紐西蘭，仲搞緊引渡。法治吖嘛，慢慢打官司，慢慢上訴。

呢啲就係真正嘅「慢慢周」。

孟晚舟反而好彩。美國換咗個總統，唔再計較華為 5G，又有大國撐腰，出盡傾國之力幫你講數。「只係」俾人軟禁咗三年，唔使好似上述人士俾人「慢慢周」，可謂不幸之中嘅大幸。

----

上面案例，令我最「不安」嘅係 Kim Dotcom 嗰單。Kim Dotcom 創立 MegaUpload 幾年之後，有間 startup 叫 DropBox，基本上提供同一樣嘅服務，不過就冇咁多人擺老翻上去share。DropBox 係美國公司，背後有 Y-Combinator 呢啲 VC 投資，自然唔會踩到美國政商界嘅「紅線」。不過，一個居港德國人點解要理會美國荷里活片賺唔賺到錢呢？Well，我都唔知，只知道現實就係地球好危險，火星都就嚟唔安全。想當年香港特區政府都要幫美國佬舐鞋底，特登捉人 BitTorrent 放片。某程度上，甚至陳乃明*都係美國無邊無際司法管轄範圍嘅「受害者」之一。

十幾廿年後，香港公務員全部真心誠意擁護《基本法》，效忠中華人民共和國香港特別行政區，應該唔會再有呢支歌仔唱。所以話呢，沈旭暉冇講錯，識國際關係真係好重要。唔好以為自己喺 A 國家，就唔使理 B 國家嘅政治。就算你唔係佢國國民，又未去過佢國家，佢都一樣可以越洋過海將你「緝拿歸案」。而呢啲國家之間嘅關係，邊個同邊個 friend，一定要搞清楚，否則一個唔覺意，你一係俾人綁架，一係就下半世打官司渡過。

滿月酒店 Hotel Del Luna

唔覺意喺 Netflix 睇咗半套《Hotel Del Luna》，成套劇基本上係 IU 嘅時裝 show 嚟⋯

不過真係好撚靚 :')

Shell themes

我對個 shell prompt 只有底線要求： 

- 我喺個 shell 度㩒實 Enter，中間唔會出現空白行。

有啲 shell prompt 多嘢搞到每下都>100ms，就會變成咁 (因為 keyboard 每秒會出十幾個 Enter keystroke)：

好多人就問：吓，如果要出 git branch 呢啲資料，就咁 run "git branch" 就已經用咗起碼幾十 ms 啦，唔通你連呢啲基本嘢都唔要？

咁就要睇下大家識唔識用更有效嘅方法做嘢喇...

Shell script 雖然唔快，但好處係唔使整新 process 出嚟。個 output 同 git branch 會稍為唔同，不過通常都唔會有問題。

PS: Powerline = 中二病

磨刀

雖然偶然會 touch up 屋企把菜刀，但都有年幾冇「認真」磨過。主要原因唔係懶，而係孤寒冇買足磨刀石。把刀好多小崩口位，又有啲位生咗銹 (仲好似唔係淨係表面)，要用個粗石大力磨走 0.x mm嘅鐵先得。一直屋企只有嚿 3000grit 嘅石，搞唔掂。

早幾日終於喺日本Amazon買咗個 1000 同 400 grit 嘅石。

最後喺廁所磨咗成粒鐘，把刀終於順返晒！

有啲唔慣佢咁利，要慢慢學返點用 :0)

強辯

好勁嘅辯論技巧：

https://www.weekendhk.com/weekspecial/%e5%87%ba%e8%bb%8c-%e5%88%86%e6%89%8b-%e7%ae%8d%e7%85%b2-ctb05-cc-857894/

自問都見過下世面，但咁情理兼備又帶少少反社會人格嘅高階辯術我都係第一次見。

太過精彩，喺度留返個底