餅形荷包蛋

最新產品：餅形荷包蛋。

最大功臣係佢 (個 skillet，包紙巾係用嚟俾大家目測大細)：

八月頭喺美國探親，見到呢個微型 skillet，正正係「踏破鐵鞋無覓處，得來全不費功夫」

仿水煮魚

愛人鍾意食水煮魚但唔食得辣，成日提自己用蕃茄整嘅水煮魚。而佢平時係唔煮嘢嘅，所以應該都係幾鍾意。

所以作為家庭煮夫嘅我就試下整。

個樣都似似哋。味道唔錯。

材料：

- 幾嚿蕃茄
- paprika 粉若干 (大約兩湯匙)
- 花椒若干 (大約兩湯匙) - 如果怕麻可以 skip
- 小豆蔻 (cardamon) 酙量
- 少量上湯/湯精華 etc. (我用咗啲 vegetable stock concentrate)
- 鹽少量 (一兩茶匙)
- 辣椒醬/豆瓣醬少量 (要少到落咗唔覺辣嘅)
- 芽菜
- 魚/肉

煮法

1. 蕃茄+鹽+水 慢火煮30-60分鐘，煮到爛，如果水乾就加水
2. 落埋其他調味料，煮多一陣，試味，自已調整
3. 落埋芽菜同魚，煮到熟就得

錢點又會繼續嚟

心血來潮想聽許冠傑首《錢會繼續嚟》。

印像之前 Youtube 有(老翻?)得聽，上 Google 搵咗幾分鐘都搵唔到。心諗：「X，又俾人舉報下架⋯」 不過網絡咁廣闊，點會冇其他(老翻?)版本吖。所以我繼續搵。又搵多咗一輪⋯ 中港台三地嘅網站都搵過晒，都係搵唔到。

其實我只係想要一個正正常常嘅 mp3 啫。有正版嘅話我唔介意俾錢架喎。本大爺寫曲(i.e. code)一個鐘都夠買一隻 CD (可能夠買十隻架！)，而下面壇嘢搞咗我唔止一個鐘⋯

我上埋 iTunes (利申：我老細嘅老細嘅老細嘅...老細係 Eddy Cue)，都係搵唔到。至於點解有咩 moov 唔用要用 mp3？因為 mp3 唔會執笠囉。

去到最後咁啱見到個 youtube video 有，但個 video 係成個 CD 嘅歌都擺晒落同一條片。咁我想要個 mp3 唯有自己郁手搞啦 :'(

mplayer 冇 -endpos (只得 mencoder 先有)，我唯有讀 stdout 去估佢幾時完事啦 :0)

你話成件事係咪 onlun9，香港唱片公司嘅錢又點會繼續嚟？

選擇

星期六晚。我醒起買漏咗啲嘢，同沖緊涼嘅愛人單咗聲，然後落樓下附近超市買咗啲嘢。俾錢嗰陣忽然收到愛人電話(miss call)，我嚇咗一跳，以為佢唔知我出咗街，嗱嗱臨打返俾佢。

原來佢沖緊涼忽然冇晒水，問我知唔知咩事。我心諗：我係遲交咗水費啫，但水務署冇理由星期六晚 cut 我水咁勤力架！？佢仲話出面好大雨快啲返屋企。嗰陣我已經喺街行緊返屋企，我望一望周圍，心諗：冇吖，一滴水都冇。唔通幾十米嘅距離嘅天氣都可以差咁遠？！

臨近屋企樓下，見到街道旁有條小溪流入坑渠。一抬頭，見到屋企大廈大門變咗個瀑布。

我諗咗幾個方案：衝？ 但會搞到成身濕晒，又唔知有冇爆屎渠，明知冇得沖涼，搏唔過。叫愛人攞把遮落嚟？ 但屋企冇大遮，都會濕喎。 最後發現側門冇(乜)水，打電話叫愛人幫手開側門 (只可裡面開)。等咗陣，我就成功冇(乜)濕咁返咗入屋。

等緊入側門嗰陣有位鄰居同我一樣情況，同我搭訕吹咗幾句。目測佢都係三十幾歲，東亞男性，身形大大份，一睇就知係做開 gym。雖然佢黃皮膚黑眼睛，但佢個樣一睇就知係英文好過中文 (係，有樣睇嘅)。佢用廣東話同我搭話，我嗰下先至知原來佢識講廣東話。（中區嘅 lingua franca 可能係英文，不過我估佢聽到我同愛人講電話，所以先用粵語搭訕⋯）我同佢講解我所知嘅情況，佢一聲 "oh shit" 脫口而出，證實咗我之前嘅猜想。

入返去我先知道原來佢都叫咗女伴落樓幫拖，喺下面一層等緊佢（正門 ground floor，側門 upper ground floor）。佢果然係同女伴中英混雜咁講嘢。最神奇嘅係佢女伴得知佢從側門入屋，一開口就責怪佢：Why didn't you wait for me? 大舊男抗辯：側門冇水吖嘛！然後佢哋就開始口角。我同愛人互望，心諗究竟有咩好拗⋯

我哋喺 UG 入𨋢，𨋢落咗 G/F 先。開門，兩個人黑口黑面靜默無言咁入𨋢。佢哋出𨋢先，大舊男暗中同我揮手道別。

呢位大舊男，聽佢談吐應該都係正常人，未必「好叻」（起碼我諗到嘅計謀好過佢少少），但目測係中高產家庭出身，喺外國讀書，有份唔錯嘅工 (呢啲都係有樣睇。同埋呢個區唔係窮撚住嘅⋯)。照計就係全港三百萬港女夢寐以求嘅「荀盤」嚟。唔知點解，又會揀咗同呢啲傲嬌麻煩女一齊。

唔係話曬恩愛乜乜物物，但識咗愛人咁多年佢都唔會無故/借故責怪我，甚至有咩不滿都係好聲好氣咁講，唯一發脾氣嘅時候係唔夠瞓嗰陣（只需放置等佢叉返電即可）。所以我諗極都唔明，點解會有人想同啲咁傲嬌嘅囡囡一齊生活，唔通啲荀盤男都係 M 屬性嘅⋯ 問號？

麻婆豆腐 - 沙嗲王XO醬

之前都提過，喺超市買到嘅百福牌豆腐，就算係所謂「煎煮硬豆腐」其實都係軟到幾乎可以用嚟整豆腐花。真正用嚟煎炒嘅嘅豆腐就只可以搵其他牌子或喺街市買。由於呢類「靚啲」嘅豆腐唔係周街都有，所以今日行街市見到豆腐檔，心思思買咗幾嚿返屋企。

豆腐整咩好呢？中國有道名菜叫做麻婆豆腐，以前中學都食唔少「麻婆豆腐飯」。所以就整咗嘞：

燈光唔好、拍攝手勢更差，冇計。不過食物係有質素嘅。

坊間都唔少麻婆豆腐食譜，不過我又使乜跟吖。日子有功，我呢十幾年學識咗點樣將味覺變返做食材清單，都有八九成準 (算係咁啦)。不過屋企冇咁多材料，辣椒、豆瓣醬、葱都缺乏。但本聰明寶寶靈機一閃，用甜麵醬同沙嗲王贈送嘅XO辣醬代替，一樣得。未必係「正宗」麻婆豆腐，但愛人食得開心（佢平時唔食辣）就已經足夠。

食材如下：

- 豆腐若干 （千祈咪L用百X牌，然後問點樣防止佢出水或爛）
- 豬肉碎
- 甜麵醬一湯匙
- 沙嗲王 XO 辣醬一湯匙
- 花椒 ~10 粒
- 生抽若干
- 生粉一湯匙
- 蒜、薑 切碎/絲
- 生油
（按：所謂「屋企冇咁多材料」係相對嘅⋯ 香港九成屋企都唔會隨時有甜麵醬啦 :0）

簡歷：

先將甜麵醬、沙嗲王醬、生粉同小半碗水撈埋備用。
豆腐煎香、起鑊、將肉煎香，然後落埋蒜薑花椒再兜幾兜，落返豆腐，再兜幾兜，再將撈渾嘅醬料倒落鑊，再兜兩兜。然後就搞掂。

最後要表揚今次嘅大功臣：

同事成日去食沙嗲王，公司仲有十支八支

薯仔鳩炒咸肉

薯仔切粒
咸肉少許
水幾湯匙
橄欖油若干
中火幾分鐘等薯仔煮熟
期間最好有鑊蓋
水揮發後加黑胡椒
兜多兩兜等薯仔乾身就上得

好嘢

同美國同事食飯，風流上司攜新眷出席。

然後佢聽過我個名，我又聽過佢個名。

不過佢出名啲。

My favourite fruits

CC BY 2.0 https://www.flickr.com/photos/photon_de

Tomato,
advocado,
eggplant,
olives,
chili pepper,
black pepper...


... no, I don't want your oranges.

蛋黃撈蛋白炒飯

上回提到先煮蛋白再撈蛋黃嘅炒蛋方法，今次 show 返張同用樣道理整嘅炒飯。



望落去冇咩特別，但食落有少少「雞蛋撈飯」嘅感覺，真係好好味。當然，今次用咗啲疑似係「雲南（買嘅）火腿」嘅鹹肉嚟整，仲要落得唔少，偏鹹，但我不嬲唔介意啲嘢食重口味，本身食剩一半，啱啱忍唔住都係食埋先瞓。

記返低啲食材先：（包裝）木耳榨菜絲、另再加多少少黑木耳、鹹肉、蛋、油、飯。

雙色炒蛋

是咁的。最標準嘅炒蛋，係將蛋白同蛋黃完全打渾先再落鑊炒。我一直以嚟都係咁做。

不過最近發現，如果先好似整太陽蛋咁將啲蛋白炒熟(其實「炒熱」就夠，煎透咗反而唔掂)，然後先再撈渾蛋白同蛋黃，最後炒出嚟嘅蛋兩色分明，蛋白啱啱熟，蛋黃半熟，可以更加帶出蛋黃嘅香味。我自己唔多鍾意太陽蛋，因為唔鍾意啲蛋太生；荷包蛋好啲，但成舊蛋黃未熱過嘅感覺都麻麻。不過如果先將蛋黃炒熟，之後先撈蛋黃，咁就可以控制蛋白同蛋黃有幾熟，有炒蛋嘅感覺之餘有太陽蛋嘅質感、荷包蛋嘅味道。

技術好啲嘅，蛋黃同油撈埋會再有啲神奇作用，有少少蛋黃醬嘅感覺。蛋黃醬撈炒蛋白咁樣，都幾得意。

諗過下叫咩名好，不過唔知點解都係負面居多，咩血肉模糊骨肉分離啲friend。

可能就咁叫雙色炒蛋就算。

順帶一題，呢招用嚟炒飯都得。今日試過。啲炒飯本身有啲太鹹，食落去竟然有「鹹蛋黃」嘅錯覺。可能如果真係隔開蛋黃落鹽醃幾下先落鑊炒，真係會變鹹蛋黃味道都唔定。

蘿蔔糕 take 2

舊年第一次認真整蘿蔔糕，不過一直都搞錯粉同水嘅比例，啲糕變得水汪汪。

今年痛定思痛，記住咗最重要嘅秘訣：一底糕起碼要 300g250g 沾米粉。啲糕未蒸之前要係半固體狀。

其他料嘅份量就好隨便。大概就係將啲粉以外嘅材料炒香佢，然後用水開起啲粉，落鑊慢火撈到佢少少凝固，之後拎去蒸。

相中嘅糕啱啱蒸好，應該等佢攤凍先再食。不過忍唔住，食咗啲。好撚正。

順帶一提，出面連鎖店買到嘅蘿蔔糕真係垃撚圾，自己整其實唔難，我呢底糕都只係搞咗一個鐘啫。

最辛苦嗰 part 係切臘腸。屋企用開嗰把唔利嘅菜刀完全切唔到臘腸，所以攞咗把旬刀出嚟用。雖然新刀好利，但因為臘腸硬，都要啲臂力。不過把旬刀本身唔係用嚟切肉嘅，用力嘅時候個 grip 麻麻地，可能真係要搵返把重少少嘅文武刀先得 :(