孟晚舟唔再慢慢周

得罪主權國周身蟻，無論邊個國家都係咁話。小國發窮惡直接搶，例如白俄羅斯喺領土上空「劫機」；未完成發展嘅大國，有時會喺鄰國「偷渡」犯人返國；但真正嘅世界強國，手段就真係與眾不同。大國講文明、法治架嘛，點會咁失禮呢？作個罪名叫盟友做白手套幫佢「引渡」啲欽犯，寫封信就得，啲 dirty work 唔使自己做。

美國以司法制度企圖「綁架」外國人都唔係新鮮事。比較廣為人知嘅係 Wikileaks 嘅 Julian Assange，澳洲人，佢喺英國俾人控告，一開始係話佢喺瑞典性侵要引渡，匿咗喺厄瓜多爾大使館，變相自我軟禁七年。去到 2019 年，厄瓜多爾大使館放倫敦警察入去拉人，然後美國終於出手話要引渡佢去美國受審。過咗咁多年，大家都唔記得 Wikileaks 係咩嚟，不過美國人冇忘記邊個爆料令佢哋 lose face。總統換咗三任，不過美國人個個都咁愛國，「國恥」係唔會隨著年月而忘記嘅。

另一位冇咁出名，又係同美國冇直接關係嘅「受害者」，係一位自稱 Kim Dotcom 嘅德國人。佢 ~2003 年喺香港 (係呀香港！) 開咗間科網公司，叫做「MegaUpload」，相信有返咁上下網齡嘅朋友都有啲印像。佢 2010 年投資移民去咗紐西蘭。2012 年，美國政府話佢侵犯版權，要紐西蘭政府越洋過海引渡佢去美國受審。而家 2021 年佢喺邊？據報仲喺紐西蘭，仲搞緊引渡。法治吖嘛，慢慢打官司，慢慢上訴。

呢啲就係真正嘅「慢慢周」。

孟晚舟反而好彩。美國換咗個總統，唔再計較華為 5G，又有大國撐腰，出盡傾國之力幫你講數。「只係」俾人軟禁咗三年，唔使好似上述人士俾人「慢慢周」，可謂不幸之中嘅大幸。

----

上面案例，令我最「不安」嘅係 Kim Dotcom 嗰單。Kim Dotcom 創立 MegaUpload 幾年之後，有間 startup 叫 DropBox，基本上提供同一樣嘅服務，不過就冇咁多人擺老翻上去share。DropBox 係美國公司，背後有 Y-Combinator 呢啲 VC 投資，自然唔會踩到美國政商界嘅「紅線」。不過，一個居港德國人點解要理會美國荷里活片賺唔賺到錢呢？Well，我都唔知，只知道現實就係地球好危險，火星都就嚟唔安全。想當年香港特區政府都要幫美國佬舐鞋底，特登捉人 BitTorrent 放片。某程度上，甚至陳乃明*都係美國無邊無際司法管轄範圍嘅「受害者」之一。

十幾廿年後，香港公務員全部真心誠意擁護《基本法》，效忠中華人民共和國香港特別行政區，應該唔會再有呢支歌仔唱。所以話呢，沈旭暉冇講錯，識國際關係真係好重要。唔好以為自己喺 A 國家，就唔使理 B 國家嘅政治。就算你唔係佢國國民，又未去過佢國家，佢都一樣可以越洋過海將你「緝拿歸案」。而呢啲國家之間嘅關係，邊個同邊個 friend，一定要搞清楚，否則一個唔覺意，你一係俾人綁架，一係就下半世打官司渡過。

滿月酒店 Hotel Del Luna

唔覺意喺 Netflix 睇咗半套《Hotel Del Luna》，成套劇基本上係 IU 嘅時裝 show 嚟⋯

不過真係好撚靚 :')

Shell themes

我對個 shell prompt 只有底線要求： 

- 我喺個 shell 度㩒實 Enter，中間唔會出現空白行。

有啲 shell prompt 多嘢搞到每下都>100ms，就會變成咁 (因為 keyboard 每秒會出十幾個 Enter keystroke)：

好多人就問：吓，如果要出 git branch 呢啲資料，就咁 run "git branch" 就已經用咗起碼幾十 ms 啦，唔通你連呢啲基本嘢都唔要？

咁就要睇下大家識唔識用更有效嘅方法做嘢喇...

Shell script 雖然唔快，但好處係唔使整新 process 出嚟。個 output 同 git branch 會稍為唔同，不過通常都唔會有問題。

PS: Powerline = 中二病

磨刀

雖然偶然會 touch up 屋企把菜刀，但都有年幾冇「認真」磨過。主要原因唔係懶，而係孤寒冇買足磨刀石。把刀好多小崩口位，又有啲位生咗銹 (仲好似唔係淨係表面)，要用個粗石大力磨走 0.x mm嘅鐵先得。一直屋企只有嚿 3000grit 嘅石，搞唔掂。

早幾日終於喺日本Amazon買咗個 1000 同 400 grit 嘅石。

最後喺廁所磨咗成粒鐘，把刀終於順返晒！

有啲唔慣佢咁利，要慢慢學返點用 :0)

強辯

好勁嘅辯論技巧：

https://www.weekendhk.com/weekspecial/%e5%87%ba%e8%bb%8c-%e5%88%86%e6%89%8b-%e7%ae%8d%e7%85%b2-ctb05-cc-857894/

自問都見過下世面，但咁情理兼備又帶少少反社會人格嘅高階辯術我都係第一次見。

太過精彩，喺度留返個底

歷史

歷史故事就喺身邊，先至會令人覺得，原來我哋真係世界嘅一分子。

美國版科網泡沫水泡科

我哋年代升大學嘅人都知，資訊科技相關科目，2000年仍然係「神科」(一度收生高過medic同law)，但隔兩年就變成 #狗也不屌 嘅水泡科。

今日偶然睇到 Hacker News 嘅討論，原來美國都有類似情況，不過當時佢哋嘅講法，係「讀嚟做咩吖，反正啲IT工都會俾人 outsource 去印度架啦」。

呢種講法，令我諗起當年升學，去港大 Business School 「面試」發生嘅事。話說，有得面試嘅，中五會考成績都唔算差，佢哋叫做睇好你，想大家互相認識下，順便借個機會 sell 下你咁。所以只會加分，唔會扣分。

Anyway，港大 Business School 面試，有個個樣勁似陳水扁嘅教授主持，大家小組討論。唔記得題目係咩喇，但好記得，佢講咗句「印度啲IT好勁」，我就多口反駁話：「喂其實印度人啲IT好廢咋喎。」

最後面試結果係：冇加分。

講真，印度人口咁多，勁人一定係有嘅，不過純粹基於人多。平均水準就真係不敢恭維嘞，唔係話工作上見過啲乜人會有咁嘅印像 (喂我當年中學雞都已經係咁覺得)，而係網上啲有impact嘅軟件項目，好少見係印度人主持或參與，通常係歐美嘅人居多；至於電腦比賽 (例如 IOI、ACM ICPC 等)，印度人嘅成績都係麻麻 (東亞同俄國最屈機，話說香港以幾百萬人嘅基數嚟講成績都唔算差)。前者講究對科技嘅直覺同熱誠，後者睇天份，印度人似乎兩樣都冇。所以 Business School 會話印度人勁，係從商業角度出發：印度 outsourcing 其實係好成功，佢哋以低成本接收咗好多唔太 innovative 同唔係太多技術含量嘅工作，主要好處係減低成本，而唔係增值。所以，傳統行業嘅 in-house 嘢作為一個「cost center」，outsource 得最勁。

去到最後，啲最賺錢嘅科技嘢，仍然喺美國矽谷。

某程度印度大國接嗰啲outsourcing生意，同美國矽谷賺嗰啲錢，係兩個完全唔同嘅行業嚟。前者其實係「傳統商業」嘅延申，後者係「軟件食咗全世界」嘅偉大一統天下功業嚟。我唔敢話印度冇人才，不過可能佢哋嘅人才走晒去美國 (btw 提醒大家 Microsoft 同 Google 嘅現任 CEO 都係印度人)。勁人走晒，留喺印度嘅就未必有能力去開發啲可以「食咗全世界」嘅技術。

至於「美國人」係咪真係咁勁呢？ 其實又不見得。只係美國因為軍事研究嘅原因成為好多電腦科技嘅源頭，而二戰後又一直係經濟強國，喺「富者越富」嘅原理之下，吸引咗全世界最頂尖嘅人才，喺全世界最發達嘅經濟體推出新產品，先至咁成功。如果⋯ 如果 Steve Jobs 一開始喺印度賣 iPhone ，佢應該係會蝕錢蝕到pk。呢啲嘢天時地利人和，唔係話照抄就抄得到，就算你學得到，亦都未必係好事嚟。