かぐや姫の物語

輝夜姬(Love is War嗰個)早排幾hit，我睇咗。最近留意到原來有個出自《竹取物語》嘅原版故仔，仲有個動畫版𠻹 (GHIBLI製作嘅)，所以我就睇咗。

香港好似冇咩人提呢套戲，上 Google 查「"輝夜姬物語"」嘅結果竟然會周圍見到宮崎駿，真係有冇搞錯。以唔特別鍾意睇 feature length film 嘅我嚟講 (有少少ADHD嘛，見上post)，呢套戲真係罕有地好睇 (利申有fast fwd)，同埋嗰種複雜嘅 aftertaste，有啲啲繞梁三日嘅感覺。

ADHD?

直至最近，我都冇諗過自己會可能有 ADHD。

"Hyperactivity-impulsivity" 嗰種我肯定唔係，起碼長大之後肯定唔係。(細個都應該冇... 不過年代遠久難以考察)

"Inattentive" 嗰種呢，由於啲徵狀通常係講 "trouble focusing" "inattention to details" "organizing tasks and activities" 之類，同我人生似乎冇咩直接關係。

但最近望下望下，越嚟越發現自己應該真係有啲 ADHD 徵狀。睇返啲 symptoms 又真係中鳩晒，IP 都唔使 check (**)。ADHD (inattentive 嗰種) 原來從來都在身邊，只不過本大爺「生涯規劃」技藝超群，將一切問題 work around 晒，啲「symptoms」變晒「優勢」咁用，所以睇住個 list 一直都未能 connect the dots...

ADHD 喺其他身上點現形 (manifest) 我唔知啦，但喺我身上最明顯嘅就係「怕悶」。嗰種「怕」係非一般嘅怕，係「悶到咁仲要我做不如一槍打死我啦」嗰種程度。迫得太緊試過會 suicidal ，絕對唔係誇張嘅修辭嚟。不過我天生好學不惓 (認識我嘅人就知我涉獵甚廣)，好多嘢只要第一次接觸都唔怕悶，所以極少會學習期間「悶」到出現 "inattentive" 嘅徵狀，學業去到大學之前都一直冇咩問題(*)。所以我之前從來冇懷疑過自己 ADHD ，大概就係咁嘅原因。

「只要人生避免晒啲「悶」嘢咪冇事囉！」所以話我「生涯規劃」好成功，一直都冇咩點出事。如果我返一份朝九晚五日日做重覆動作嘅工，我諗我一早入咗精神病院。好在唔係。但嗰啲咩「成日唔見嘢」、「唔記得交電話費」、「約咗人唔記得咗」嗰類生活問題其實都有嘅，但始終只係「不便」，唔死得人，有方法 workaround，冇咩所謂。暫時生活上最大嘅問題係，只要平時啲煩瑣嘢太多，會 overload，但我跟 schedule 做嘢又會「要我做不如一槍打死我啦」，所以好多時都要「斷捨離」，化繁為簡，俾啲空間自己走盞。

啲人成日話，high functioning ADHD 其實係好嘢嚟。我好同意。「怕悶」引致嘅 "attention deficit" 係一種 "the glass is half empty" 嘅講法，實際上我從來都認為「悶就咪9做」係成功嘅要素 。唔做悶嘢，集中精力去做「有趣」嘅嘢，咁世界先至會朝著有趣嘅方向發展架嘛。我由十幾歲嗰陣就已經好清楚，只要自己願意專注去做一樣嘢，嗰樣嘢一定會做得好好，斷估比平均高兩三個 SD 咁上下。不過一旦要重覆去做嗰樣嘢，就算第一次係好好，第二次都會差咗，然後每況越下，直至做到比一般廢人更差為止。

睇返網上啲資訊，呢種玩法似乎唔係 typical ADHD 患者嘅煩惱嚟，所以佢哋只有 attention deficit，我就係 "focus surplus" (佢哋叫做 "hyperfocus")。只要避開重覆性或悶嘅工作，我係絕對唔會 attention deficit 嘅。所以我一直都冇諗過自己竟然係 ADHD。

至於點樣避免重覆性同悶嘅工作呢？好簡單，就係做電腦同埋做創作。電腦嘅主要功能之一就係 將程序自動化。我只要知道要做乜，寫一次程式，以後第二次以致第 N 都由電腦自動執行，就唔會有「重覆做嘢越做越差」嘅問題；至於點避免「悶」嘢⋯ 只要你證明自己有本事處理奇難雜症，上頭就唔會暴殄天物俾你做機械人架啦 :0) 我甚至懷疑我「處理悶嘢」都係有一手：始終 ADHD 係個 spectrum 嚟，「正常人」處理悶嘢都係會越嚟越難集中，而我就係熟知晒所有「伏位」，制定程序嗰陣可以做到比較「滴水不漏」-- 只要係我設計個程序而唔係我人手 run 就 OK，要我 run 實出事無誤。

不過，人生始終會越嚟越少「有趣」嘅嘢做，如果第日所有嘢都變得沉悶又點算？呢個先至係我遇到最大嘅 existential question 呀。不過呢個問題明知冇解，就唔好諗佢太多喇。

----------

* 「冇問題」係結果，不過過程都係幾有趣嘅，大概係每個科目分別都用「專注去做一樣嘢」嘅方法逐個擊破，一直都覺得學校上堂每日上五六個唔同嘅科目嘅課係好影響我。俾著我最好係 intensively 咁幾日學完一個 topic 再去諗第二科，而我溫公開試嘅方略通常都係咁。

**: 冇驗呀，驗嚟做乜？ 雖然話 self-diagnosis 好危險，但屌你咩，我做 armchair psychologist 都係有一手架。如果呢個「病」係真嘅我肯撚定有。

來自星星的你

 無聊起嚟走去睇咗《來自星星的你》，發現原來都唔係坊間講到咁不堪。

作為愛情偶像劇，賣靚仔同FF嘅劇嚟講，算係幾唔錯架喇。

感覺前半截劇情幾緊湊，不過後半有啲拖拖拉拉。人設係有啲屈機但作為 "junk food" 咁鳩睇還好啦。 

Summer

盛夏睇 500 Days of Summer 好似幾應節。冇咩原因，心血來潮。

記得十幾年前有朋友介紹睇，當時我正值人生低潮，同男主角個情況有啲似，佢話可能會有共鳴咁。

但一直都冇睇⋯ 當時冇，之後都好似冇，不過呢幾年記性太差真係睇完唔記得都唔出奇。

Anyway

有返少少人生歷練嘅人都會明白，男主角 Tom 係個「小屁孩」。唔識得愛人，所以得唔到愛，十分之正常。男主角嘅是是非非一早有定論。相反，套戲以男主視角敍事，女主角 Summer 嘅心路歷程究竟係點，似乎有啲撲朔迷離。事實係咪咁呢？我覺得，劇本對女主角著墨相對較少，但已經勾劃出佢嘅心路歷程：

- 自細父母分離，唔相信愛情
- 喺學校唔受朋輩歡迎，平時被孤立，養成奇特嘅性格
- 會鍾意人，但怕受傷
- 冇朋友，好想交個真心朋友
- 怕受傷、唔信愛情，但更加怕孤獨

Summer 對 Tom 嘅忽冷忽熱，某部份可以用 Tom 呢位「不可靠的敘事者」解釋，但我認為更合理嘅係 Summy 本身「唔相信愛情但更怕孤獨」嘅性格設定。好多人都睇得出 Tom 一開始係「小屁孩」之後略有成長，但女角 Summer 何嘗唔係？以佢所講，佢之前啲男朋友其實都係「炮友」性質，遇到 Tom 先第一次嘗試放開心扉，同異性交身之餘仲交埋心。

任何戲劇最重要嘅元素就係傲嬌，女角基本上一定要傲嬌嘅[1]。Summer 明明話唔想談戀愛，但最終熬唔住孤獨同 Tom 發展咗一段唔知係乜嘅關係。如果大團圓結局，就係 Tom 「融化咗女主角冰冷嘅心」然後娶得美人歸 —— 不過呢刻 Tom 係個唔識得點樣愛人嘅「小屁孩」，Summer 亦都視 Tom 為朋友多於戀人，始終覺得佢唔係啱嘅人。

觀眾發現 Summer 閃婚第一個反應可能係驚愕，但再仔細諗下就會好清楚： Summer 來自破碎家庭，唔相信愛情同婚姻，同朋輩關係唔好，唔多識點同人相處，一直只靠美貌攞著數，同埋同俊男做炮友，根本唔知戀愛為何物。故事初佢啱啱搬到新城市，好想交新朋友，見 Tom 冧佢，就打算用美色交換友情。點知發現 Tom 原來真心膠得咁緊要，自己亦因缺乏人生經驗分唔清愛情同友情嘅界線，一段關係喺友情同愛情中交錯，不淪不類。雖然做唔成情人，但孤怜怜嘅 Summer 仍然自私咁想 Tom 做佢嘅「朋友」，事實上 Tom 亦都可能真係佢第一個佢願意真心相待嘅朋友嚟。最後，雖然兩人不歡而散，但 Summer 有咗呢次「交朋友 + 戀愛」經驗之後， 佢對自己、對處理人際關係、對愛情嘅信心都明顯增強，所以之後再遇上一個令佢心動嘅男人，佢就決定嫁俾佢。

當然，從來都冇人話 Summer 嘅婚姻好美滿。嗰個男人，可能純粹冇 Tom 咁失敗同落泊而已。或者，有潦倒嘅 Tom 做對比，就算普通人一個都變得好似白馬王子咁耀眼。

所以，Summer 係咪一個「 bitch 」呢？由於成長背景關係，佢係一個唔識社交但機心重嘅人。 遇到 Tom 之前，佢所認識嘅世界嘅人都對佢好仆街，而佢「只係」渴求有真心朋友，飢渴到想用美色去換取啫。明碼實價，一早講明，係咪真係咁 bitch？我真係唔識評論。

到故事最後，Tom 終於重拾自信唔做毒撚主動約女仔，而 Summer 亦都被 Tom 嘅天真感動，願意對愛情孤注一擲。呢個故仔係有各自有缺陷嘅一男一女遇上對方因而成長嘅故事，片頭 narrator 一早講咗，呢個唔係一個 "love story"。

----

之後諗諗下，發現 500 Days of Summer 男女之間嘅關係，有啲似王小波嘅「黃金時代」。點解「偉大友誼」竟然係用嚟「敦」，答案大概與上述類同⋯

----
[1] 男比女傲嬌嘅故仔印像中唔多，最深刻印像係 Pride and Prejudice (另按：不過P&P女主角嘅當然都係傲嬌)。不過作者係女人，可能都有啲關係⋯ 諗落P&P男主角好似有少少都敏俊嘅影子?????!!

Venus

印像中之前都見過 venus_angelic 呢個名，不過今日因為無聊花咗少少時間食咗佢幾年嘅花生，佢個故事都真係幾癲。有一百萬個 subscriber 但一個可以當作家人嘅人都冇，靠 youtube 觀眾倍伴成長，究竟係一個咩世界？ 真係難怪會有咁多心理病 :(

葉師傅沙嗲牛

最出名喺素食餐廳整威靈頓牛肉嘅葉師傅又有新搞作！

沙嗲牛~

葉師傅喺Facebook公佈呢個新產品嘅時候我都睇漏咗眼——因為佢Facebook嗰張圖實在太⋯普通。 不過食過葉師傅嘅出品都知道必屬佳品，所以我早幾日就同佢訂咗六份沙嗲牛。

即係咁，我影相都唔叻，但起碼咁影先得架嘛⋯ (最多加句：麵唔包)

食評：好好食 😋 其實呢個係第三包，頭兩包我已經搶先食晒，今次特登留返個機會俾相機，大家先有相睇~  希望我煮嘅麵唔會失禮葉師傅嘅牛肉啦 XD

份量方面，我比較大食所以一個人食晒，大大啖肉，絕對冇呃秤。如果你冇我咁大食，可以當兩人份量嘅。

製作花絮：

葉師傅建議 sous vide 但本窮撚冇架生所以⋯

兩個煲裡面都係水

Still no life

就係咁～