First world problem

First world problems..... 特登走去睇返 egress 價位，確認返我冇搞錯 order of magnitude (1GB $0.01 同 $0.1 同 $1 係好大分別架) 另外好在 target audience 得千幾萬人，每人每日最多都玩兩三次，個 upper bound 好清晰。

睇嚟呢個有機會係我人生最 hit 嘅(個人製作)產品。

 

"10x programmer"

睇緊死鬼舊老細啲訪問，都唔係第一次睇，每次都領悟到啲新嘢。

佢話世界上好多嘢，最好水平嘅同一般嘅水平，都係相差幾成至一倍。但好嘅軟件工程師同一般嘅，差距有五十倍。呢個係九十年代嘅訪問嚟。

以今日嘅軟件開發工具嚟講 (*cough* copilot *cough* stack overflow)，可能可以將普通軟件工程師嘅程度提升，所以 50x 可能係高估咗。但你問我嘅話，「10x programmer」係絕對存在嘅，呢樣嘢嘅存在簡值係無容置疑。唔知係咪受美國啲奇怪政治正確風氣影響，見好多人唔接受「10x programmer」呢樣嘢，真係唔知係意識形態驅使，定係真係見識太少。

當然，所謂 10x 都係好粗疏嘅量化，雖然呢樣嘢絕對存在，但如果要標籤某某係或唔係 "10x programmer " 實在唔係好恰當。喺一個健全嘅團隊入面，唔應該有任何人工作效率比其他人高出 10 倍，呢樣嘢對被標籤嘅人都唔公平。何況有時 10x 係低估咗，好多時勁人就係能人所不能，你搵十萬大軍都做唔到嘅嘢，佢一個人就搞得掂。呢啲人才係「無價」嘅，不過最後佢份糧通常最多都係你(十)幾倍。

好多概念雖然喺現實存在，但唔代表應該隨便用。人概價值好難用單一維度去量度。