雜不甩品味：平日聽咩歌？

呢幾日得閒少少，執完房就執埋電腦。平日我唔算係好熱衷聽歌，十幾廿年前最興 mp3、玩 iPod 嘅年代，我都係冇「養成」聽歌嘅習慣。我天生冇咩音樂細胞，聽住歌做嘢轉數會低啲，所以就冇咩點聽。不過呢十年八載都係遇著一啲自己鍾意嘅歌手，同埋收集咗一堆自己幾鍾意嘅歌。有啲係流行曲，有啲名不經傳，有香港本土嘅，有外國嘅，有啲係覺得好聽，有啲係有啲特別留念嘅意義，有啲係純粹惡搞。見開咗個 blog 講生活無聊嘢，就分享下啦。絕大部份都係跟住個名上網搵到嘅嘢嚟，除咗最後嗰首⋯⋯未必咁易搵。

奇異食譜：響17溝可樂

朋友 C 醫生用「響17」溝可樂，貼圖放上臉書。

好多人留言話「乜你咁浪費！」、「暴殄天物！」，我深有同感。直至有一日，我上佢屋企親身嘗試呢個組合。

「響17」近年享負盛名，一支炒到兩千蚊。大眾用 Johnnie Walker 溝綠茶就試得多，響17 溝可樂又有幾多人捨得試呢？ 每 ml 都差唔多值 $3，雖然唔算天價，但係都咪話唔貴。

筆者飲過「響17」同「響12」，雖然兩者都係一流嘅威士忌，但如果 straight 飲的話，「響 17」嘅味道略嫌太複雜，就咁飲落去，感覺好似迫住味蕾跑馬看花，未能深刻感受每一道香味；反而「響 12」就啱啱好，令人覺得滿足。

所以「響17」真係應該開稀嚟飲嘅。

嗰日喺 C 醫生屋企試過各種「響」同可樂嘅配搭，發現始終係「響17」溝「Coca Cola Plus」最好飲。一般可樂都得，但「Coca Cola Plus」係絕配。呢隻可樂係日本貨，香港都有得買，不過要周圍搵下先得。

「響 17」多層次嘅味道，喺可樂嘅調和下，任由舌頭上嘅味蕾慢慢享受，人生一樂也。我試過之後，已經唔會再想 straight 飲「響 17」。

C 醫生對「暴殄天物！」嘅回覆係：「It is surprisingly good. Very smooth, and the arguably overintense nose is persistent throughout the whole drink. I put about half an ounce into it.」

新奇食譜 - 益力多 Gin

屋企雪櫃時常有益力多，我都成日飲。有日，攞起支益力多，忽然想飲少少酒。倒啲 gin 落去，感覺都幾夾。然後，稍為改良，就成為呢個「益力多 Gin」了。

因為有咸檸檬，飲落去有少少似七仔買到嗰種咸柑桔檸檬。加水係個人口味問題，我唔鍾意太甜嘅 cocktail。唔使多，10ml 左右就夠。或者唔加都得，自己試。





益力多 Gin

- 益力多 半樽
- 咸檸檬 少少
- 冰
- 水 少量
- gin 隨心

Yakult Gin

- Half bottle of Yakult
- Preserved (salted) Lemons
- Ice cubes
- Tiny amount of water
- Gin, to taste